Беларуская партыя “Зялёныя” вырашыла прыняць удзел у выбарчай кампаніі 2019 года, каб падтрымаць кампанію па абароне Незалежнасці Беларусі, моладзевыя кліматычныя акцыі і прасоўваць тэму недапушчальнасці запуску БелАЭС.

Такое рашэнне было прынята на на з'ездзе партыі  24 верасня.  

Мы хацелі б падкрэсліць, што не лічым гэту кампанію выбарамі і не маем намеру рабіць выгляд, што змагаемся за месцы ў Палаце прадстаўнікоў. Мы добра ўсведамляем, што сапраўдных выбараў у краіне даўным-даўно не адбываецца, роўна як не існуе і законна абранага Парламента.

Мы разглядаем свой удзел у гэтым працэсе выключна як інфармацыйную кампанію.

Нашы мэты: скарыстаць магчымасць доступу да публічнай прасторы, што дае выбарчая кампанія і прыцягнуць грамадскую ўвагу да важных для нас праблем.

Галоўнымі нашымі тэмамі на парадку дня будуць:

Важнасць захавання незалежнасці Рэспублікі Беларусь у святле паўсталай пагрозы “паглыбленай інтэграцыі” з Расіяй.

Недапушчальнасць запуску АЭС у Астраўцы, ва ўсялякім разе, да выканання ўсіх міжнародных і грамадскіх рэкамендацый і ўсебаковай і празрыстай экспертызы праекта.

Патрэба пераходу Беларусі на ўзнаўляльную энергетыку як грунт для энергетычнай і эканамічнай незалежнасці.

Таксама кандыдаты будуць мець магчымасць заявіць свае ўласныя, больш лакальныя тэмы.

Усе кандыдаты гатовыя падаць свае пляцоўкі моладзі, што хоча далучыцца да глабальных кліматычных акцый. Ва ўмовах, калі закон пра масавыя мерапрыемствы робіць падобныя дзеянні фактычна немагчымымі, мы лічым важным забяспечыць легальныя і бяспечныя пляцоўкі для выказвання моладдзю сваіх пазіцый.

Мы таксама гатовыя падаць свае пляцоўкі актывістам кампаніі ў падтрымку незалежнасці Беларусі (пры адсутнасці супярэчнасцяў з каштоўнасцямі Зялёных).

 

*использовано фото с https://ru.depositphotos.com/