Сябры Беларускай партыі «Зялёныя» прынялі ўдзел у Кангрэсе Еўрапейскай Партыі Зялёных (EGP), які меў месца 13-15 лістапада ў французскім Ліоне.  Яны таксама сталі сведкамі рэакцыі грамадства на трагічныя падзеі 13-га лістапада ў Парыжы.

Каментар аднаго з удзельнікаў дэлегацыі БПЗ: "Першапачаткова асноўнымі тэмамі Кангрэсу мелі быць снежаньскі кліматычны саміт ў Парыжы, праблема міграцыі ў Еўропу і сірыйскі крызіс. Аднак трагедыя ў Парыжы паўплывала на ход мерапрыества.    Усе аказаліся ў шоку і разгубленасці. У суботу на Кангрэсе адбыліся выбары новага кіраўніцтва, і некаторыя кандыдаты нават не змаглі зрабіць прэзентацыю: расплакаліся ў працэсе. У французскіх зялёных офіс знаходзіцца ў тым раёне, які абстралялі. Нехта са знаёмых загінуў».

Па словах актывіста, у сувязі з апошнімі падзеямі становіцца праблематычным правядзенне кліматычнага саміту ў Парыжы ў снежні, на якім планавалася прыняць вельмі важныя для лёсу планеты рашэнні. «Адно з самых буйных мерапрыемстваў было запланавана якраз у той залі, дзе ўчора захапілі закладнікаў», — зазначае актывіст БПЗ. На ўдзел у той імпрэзе ў рамках саміту ўжо зараз запісалася каля тысячы чалавек. Аднак эколагі кажуць, што зробяць усё, каб саміт адбыўся.

Што тычыцца палітычных наступстваў, то  зараз французскія і еўрапейскія зялёныя  асцерагаюцца росту радыкальных правых настрояў у грамадстве. Тым больш, што праз два месяцы ў краіне рэгіянальныя выбары, і ксенафобская партыя "Нацыянальны фронт" Марын Ле Пэн становіцца іх фаварытам.