Беларуская партыя зялёных (БПЗ) падтрымлівае барацьбу кітайскіх працоўных, занятых на беларускіх прадпрыемствах, за свае сацыяльна-эканамічныя правы.
2-га ліпеня рабочыя з Кітая, якія занятыя на будаўніцтве комплексу г. Добрушы Гомельскай вобласці, пешшу прыйшлі ў Гомель, каб запатрабаваць кампенсацыі пазыкаў па заработнай плаце, якую, па іх словах, ім затрымліваюць ужо трэці месяц. Кардонны камбінат будуецца на базе Добрушскай папяровай фабрыкі «Герой працы». Падрадчыкам выступае кітайская карпарацыя «Сюань Юань» (Xuan Yuan Industrial Development Co., LTD), яна ж адказная, па паведамленнях прэсы, за выплату кітайскім будаўнікам заработнай платы.
Беларуская партыя зялёных (БПЗ) падтрымлівае барацьбу кітайскіх працоўных, занятых на беларускіх прадпрыемствах, за свае сацыяльна-эканамічныя правы. Тым больш, што іх пратэст здарыўся на фоне цяжкай сітуацыі, якая склалася на айчынных прадпрыемствах, дзе ў апошні час мае месца практыка скарачэння ўзроўню аплаты працы або яе затрымкі, масавых звальненняў або прымусовай адпраўкі работнікаў у неаплатныя адпачынкі. У гэтым сэнсе, БПЗ згодная з меркаваннем лідэраў незалежных прафсаюзаў, якія называюць акцыю кітайскіх рабочых пазітыўным вопытам калектыўнай арганізацыі і грамадзянскай свядомасці, які павінен паслужыць прыкладам для беларускіх грамадзян у справе абароны іх працоўных правоў.
На погляд членаў БПЗ, не менш важна і тое, што рэзанансны выступ працоўных з КНР здольны падарваць ксенафобскія стэрэатыпы з шэрагу беларускіх медыя. У апошні час пачасціліся выпадкі навязвання беларускай аўдыторыі міфаў пра культурную непаўнавартасць працоўных мігрантаў з краін Азіі, пра тое, што яны, маўляў, нясуць пагрозу беларускай «еўрапейскай» ідэнтычнасці, пагражаюць нацыянальным традыцыям і г.д. Бясспрэчны факт калектыўнай мабілізацыі працоўных у абарону сваіх правоў у Добрушы разбурае гэтыя расісцкія клішэ.
Акрамя таго, у апошні час настойліва запускаюцца чуткі, што ў скарачэннях працоўных месцаў і скарачэннях заработнай платы беларускіх працоўных вінаватыя ня прыватныя і дзяржаўныя наймальнікі, а тыя ж кітайцы або прадстаўнікі іншых аддаленых і не вельмі ад нас рэгіёнаў (напрыклад, краін Цэнтральнай Азіі, Украіны і г.д.), якія прыбываюць у Беларусь у пошуках працы. Тое, што здарылася красамоўна сведчыць пра тое, што і беларускія, і кітайскія - любыя наёмныя работнікі ў роўнай меры з'яўляюцца аб'ектам эксплуатацыі з боку капіталу, які, як вядома, не мае нацыянальнасці.