У 69 гадоў пайшоў з жыцця заснавальнік  БПЗ  Алег Сямёнавіч Грамыка.  Алег Сямёнавіч нарадзіўся ў в. Залессе Брагінскага р-на Гомельскай вобл. (зараз адселеная 12км зона каля Чарнобыльскай станцыі). У 1973-ім годзе закончыў Магілёўскі педінстытут. Пасля працаваў педагогам у Гомелі.

Алег Грамыка так распавядаў у адным з інтэрв’ю пра тое як узнік праект партыі: “Беларуская партыя "Зялёныя" была ўтворана ў 1994 годзе ў Гомелі. Мая сям'я жыла недалёка ад Чарнобыля, дзве сястры і брат памерлі ад анкалагічных захворванняў. Гэта значыць мяне праблемы экалогіі закранулі напрамую. І калі мяне на адной з экалагічных канферэнцый у Германіі спыталі, чаму ў Беларусі да гэтага часу няма партыі "зялёных", я ўзяўся за яе стварэнне".

Да таго як стаць партыйным лідарам Алег Сямёнавіч  быў настаўнікам геаграфіі.  Пасля сыходу ў палітыку гамельчукі абіралі яго дэпутатам Гомельскага абласнога і гарадскога саветаў.Ён доўгі час быў адзіным лідарам партыі, які жыў не ў Мінску, а ў Гомелі. Менавіта Алег Грамыка прапанаваў у 2006-ым высунуць на пасаду адзінага кандыдата ад апазіцыі Аляксандра Мілінкевіча.

Пасля сыходу з паста старшыні Алег Грамыка працягваў падтрымліваць кантакт з БПЗ і дапамагаць новаму кіраўніцтву партыі. Увосень мінулага году Алег Грамыка прыняў удзел у працы Зялёнага кангрэсу. Нажаль гэта была апошняя сустрэча.

Партыя Зялёных выражае спачуванне родным і сябрам нябожчыка