Заява Беларускай партыі "Зялёныя" з нагоды правядзення «Чарнобыльскага шляху - 2015»
Сёння беларускі народ адзначае чарговую гадавіну Чарнобыльскай трагедыі, што назаўжды змяніла яго лёс, роўна як лёс людзей, якія пражывалі на сумежных тэрыторыях Расіі і Украіны. Тады гэта была наша агульная бяда, найбольш катастрафічныя наступствы якой ўдалося ліквідаваць гераічным подзвігам 600 тыс. «ліквідатараў», якія прадстаўлялі практычна ўсе савецкія рэспублікі.
Традыцыйна ў Беларусі гэтым трагічным падзеям прысвячаецца шэраг жалобных мерапрыемстваў, адным з якіх заўсёды з'яўляўся «Чарнобыльскі шлях». У гэтым годзе ён цалкам мог вярнуць сабе свой натуральны экалагічны статус, для чаго ў склад аргкамітэту быў накіраваны прадстаўнік ад  Беларускай партыі «Зялёных» (далей - БПЗ).

Аднак напярэдадні гэтага мерапрыемства ў шэрагу незалежных СМІ стала з'яўляцца цалкам канкрэтная інфармацыя, якая адлюстроўвае меркаванне часткі арганізатараў і  тычыцца мэтаў і фармату правядзення «Чарнобыльскага шляху - 2015». Наколькі можна было меркаваць па заявах ў прэсе, асобная пазіцыя БПЗ і некаторых іншых экалагічных арганізацый пачутая не была, і аргкамітэтам «Чарнобыльскага шляху» была ўсё ж прынята прапанова зрабіць асноўным пасланнем маючага адбыцца 26 красавіка 2015 года шэсця барацьбу «з расійскай ядзернай пагрозай».
Варта асоба адзначыць, што рашэнне прымалася ва ўмовах адсутнасці якіх-небудзь дэмакратычных працэдур, па-за пошукам кампрамісу, роўна як ва ўмовах закрытасці працэсу не толькі ад шырокай грамадскасці, але нават ад актывістаў партый і арганізацый, якія ўвайшлі ў аргкамітэт.
У сувязі з чым, мы хацелі б заявіць наступнае.

БПЗ паслядоўна крытыкуе атамную энергетыку як не толькі патэнцыйна небяспечную, але і як загадзя больш затратную, эканамічна менш эфектыўную і бесперспектыўную у параўнанні з «зялёнымі» яе варыянтамі; у сувязі з гэтым БПЗ прынцыпова стаіць на пазіцыях недапушчэння будаўніцтва АЭС у Беларусі, і выступае супраць атамнай энергетыкі ў глабальным маштабе.
Мы перакананыя, што любая атамная энергетыка ўяўляе каласальную пагрозу ў любым пункце нашай планеты, пра што, як мінімум, сведчаць нядаўнія трагічныя падзеі ў Фукусіме.
Адначасова з гэтым БПЗ заўсёды выступала і працягвае выступаць супраць крайняй палітызацыі чарнобыльскай тэмы і прысвечаных чарнобыльскай трагедыі памятных мерапрыемстваў, супраць выкарыстання гэтых мерапрыемстваў у мэтах нацыяналістычнай прапаганды, а самай чарнобыльскай катастрофы - як падставы для геапалітычных спекуляцый.

Нам сумна прызнаваць, што асобныя беларускія партыі і палітычныя рухі традыцыйна шукаюць праблему ў «нацыянальнасці» славутага «мірнага атама», у той час як мы ўпэўненыя ў тым, што «мірнага атама» ўвогуле не існуе, і што радыяцыя не мае нацыянальнасці і не ведае межаў.
На нашу думку, галоўныя вытокі небяспекі сыходзяць не ад асобных нацыянальных дзяржаў, а ад транснацыянальных карпарацый і звязаных з імі кіруючых элітаў, якія выкарыстоўваюць атамную энергетыку як інструмент сваёй міжнароднай капіталістычнай экспансіі. Ядзернае лобі носіць інтэрнацыянальны характар, і экалагічныя выклікі чалавецтву становяцца ўсё больш глабальнымі. Таму мы лічым, што спробы падзяляць ядзерную небяспеку па нацыянальнай прыкмеце з'яўляюцца абсалютна некарэктным і бессэнсоўным заняткам.

Толькі сумеснымі намаганнямі і ў глабальным маштабе мы здольныя пераадолець  уплыў атамнага лобі. Таму ўсе намаганні па абароне навакольнага асяроддзя павінны грунтавацца на самым шырокім міжнародным супрацоўніцтве і салідарнасці.

Усе спробы ва ўгоду чыім-то геапалітычным інтарэсам надаць антыядзернага руху вузкі лакальны характар, зрабіць яго інструментам не сумленнай палітыкі, а цынічнага палітыканства, як паказвае, у тым ліку, і практыка "Чарнобыльскага шляху", у цэлым дыскрэдытуюць антыатамны рух ў вачах беларускага грамадства , што з'яўляецца для БПЗ абсалютна непрымальным. На нашу думку, менавіта гэта і прывяло «Чарнобыльскі шлях» да страты цікавасці да яго з боку грамадскасці і яго зацяжнога «крызісу жанру».
Беларуская партыя «Зялёныя» выступала і працягвае выступаць за абарону навакольнага асяроддзя, жыцця і здароўя чалавека ад любых пагроз - па-за залежнасці ад таго, ад чыіх карпарацый і дзяржаў яны б ні паходзілі. Мы лічылі і лічым, што «Чарнобыльскі шлях» менавіта гэта павінен выказваць - разуменне не толькі лакальных, але і глабальных чалавечых пагроз, і нашу меру адказнасці за іх пераадоленне.

За бяз'ядзерны свет, за бяз'ядзерную Еўропу, за бяз'ядзерную Беларусь!