Двух сябраў Беларускай партыі Зялёныя будуць судзіць за акцыю салідарнасці з Charlie Hebdo.

Пакаранне штрафам ці адміністрацыйны арышт на некалькі сутак пагражае сябрам Беларускай партыі “Зялёныя” Паўлюку Канавальчыку і Зміцеру Кучуку за арганізцыю акцыі салідарнасці з растралянымі французскімі журналістамі.

Нагадаем, што 11 студзеня адбылася міжнародная акцыя смутку па загіблых журналістах французскай сатырычнай газеты Charlie Hebdo, якая была атакаваная тэрарыстамі 7 студзеня.

Па ўласнай ініцыятыве на жалобную акцыю да французскага пасольства ў Менску прыйшло чатыры чалавекі. Яны маўкліва стаялі з плакатамі “Je suis Charlie” (Я - Шарлі). З такімі сама плакатамі выйшлі ў гэты дзень на вуліцы больш за мільён чалавек у Францыі і іншых еўрапейскіх краінах.

Аднак гэтая нешматлікая грамадзянская ініцыятыва не засталася без увагі беларускіх органаў правапарадку. Праўда, як кажуць, ужо заднім чыслом.

21 студзеня, аж праз дзесяць дзён пасля акцыі, Паўлюка Канавальчыка пад дзвярыма ягонай кватэры пільнавалі супрацоўнікі міліцыі.

Яны высунулі яму абвінавачанне ў арганізацыі несанкцыянаванага масавага мерапрыемства. У якасці доказаў паказалі фатаграфіі з акцыі і раздрукаваную перапіску з сацсеткі Facebook.

Зміцера Кучука, які падтрымаў акцыю ад імя Беларускай партыі “Зялёныя”, таксама вышуквалі, але ён на той момант быў у ад’ездзе. Праз дзень яго выклікалі ў Цэнтральны РУУС Мінска  і таксама склалі пратакол аб удзеле у несанкцыянаваным пікеце.

Цяпер запрашаюць у міліцыю і галаву Аб’яднанай Грамадзянскай Партыі Анатоля Лебедзька, што далучыўся да акцыі і актыўна пісаў пра яе ў сацсетках.

Артыкул 23.34 КоАП  (парушэнне парадку арганізацыі ці правядзення масавага мерапрыемства ці пікетавання) прадугледжвае пакаранне штрафам або адміністрацыйным арыштам да 15 сутак.

Калі дакладна адбудуцца суды, пакуль невядома.  Актывісты чакаюць павестак на гэтым тыдні.