Чарговае паседжанне ў рамках працы па стварэнні антыкарупцыйнай платформы адбылося на гэтым тыдні. У ім узялі ўдзел прадстаўнікі шэрагу беларускіх партый і грамадскіх арганізацый, у тым ліку Беларускай партыі "Зялёныя".

Падчас абмеркаванняў было прынята рашэнне працягваць прэзентацыю Антыкарупцыйнай платформы ў рэгіёнах, і ўжо ў фармаце шырокай дыскусіі з удзелам вялікай колькасці людзей. Таксама плануецца ў бліжэйшы час правесці колькі круглых сталоў у рэдакцыях незалежных газет.

На сустрэчы прадстаўнікі 10 палітычных арганізацый падпісалі зварот да сталічных уладаў з прапановай правесці ў Мінску слуханні па праблемах карупцыі і абмеркаванню Антыкарупцыйнай платформы (тэкст звароту прыведзены ніжэй). Акрамя таго, усе арганізацыі пагадзіліся з прапановай аб стварэнні грамадскага антыкарупцыйнага камітэту, які стане дзейсным механізмам грамадскага кантролю.

Карупцыя - адна з найбольш небяспечных праблем Беларусі. Па дадзеных незалежных экспертаў, карупцыйны складнік вымяраецца ў 28-32 мільярда даляраў у год. І Мінск не з'яўляецца выключэннем. Адна з прычын неэфектыўнай барацьбы з карупцыяй - адсутнасць грамадзянскага, грамадскага кантролю за дзейнасцю дзяржаўных структур улады і кіравання, а таксама адсутнасць транспарэнтнасьці ў дзейнасці праваахоўных органаў.

У сувязі з гэтым, мы, прадстаўнікі палітычных партый і грамадскіх аб'яднанняў, звяртаемся да Вас з прапановай правесці публічныя слуханні пра сітуацыю з карупцыяй у Мінску, а таксама для абмеркавання прапаноў, выкладзеных у праекце Антыкарупцыйнай платформы.

Дадзеная ініцыятыва прадыктавана нашай заклапочанасцю праблемай карупцыі (Беларусь займае 123-е месца па ўзроўні распаўсюджвання карупцыі ў рэйтынгу Transparency International, што адносіць нашу краіну да апошняй трэці ўдзельнікаў спісу), а таксама жаданнем садзейнічаць мінімізацыі негатыўных наступстваў карупцыі ў Мінску.