11 студзеня ўся Францыя выходзіць на мітынгі смутку ў сувязі з растрэлам газеты Charlie Hebdo, і салідарнасці з журналістамі. У Беларусі Зялёныя таксама вырашылі падтрымаць французаў і нагадаць пра каштоўнасць свабоды слова.
З заклікам прыйсці ў 12 гадзінаў да пасольства Францыі ў Мінску ў сацсетцы Facebook выступіў былы рэдактар беларускай сатырычнай газеты «Навінкі» Паўлюк Канавальчык. «Навінкі» даўно ўжо зачыненыя ўладай, але, тым не менш, застаюцца легендай у беларускім медыйным асяроддзі. Заклік Канавальчыка падтрымала Беларуская партыя «Зялёныя».
Пад час размовы з журналістамі Паўлюк Канавальчык зазначыў, што для яго вельмі важна падтрымаць французскіх калегаў, з якімі ён, аказваецца, нават меў агульныя справы. «Для нас гэта вельмі важна, бо, калі ў сатыру страляюць, гэта не ёсць добра. Калі няма для змагання з сатыраю іншых аргументаў, апроч пулі, гэта і кажа пра тое, што грамадства — не здаровае, мякка кажучы», — сказаў Канавальчык.
З выданнем Charlie Hebdo газету «Навінкі» звязвала не толькі агульная ідэя, але і прафесійныя стасункі. «Так ці інакш, мы з імі перапісваліся, мелі кантакты з гэтым часопісам. Нават мелі планы на супрацоўніцтва — былі ідэі перакласці і перавыдаць у Беларусі некаторыя іхныя коміксы, прысвечаныя еўрапейскай палітыцы. Гэтых людзей мы, збольшага, добра ведаем, і таму нас вельмі блізка закранула гэтая трагедыя. Не толькі ў плане таго, што гэта нашыя калегі, але таму, што гэта нашыя завочныя сябры», — кажа Канавальчык.
«Мы салідарныя не толькі як былыя работнікі сатырычнага выдання. Важна тое, што людзі могуць цярпець нават не за сваю ідэю — за прафесію», — дадае ён.
 Намеснік старшыні партыі «Зялёныя» Дзмітрый Кучук, у сваю чаргу патлумачыў: «У Парыжы сёння на акцыю салідарнасці выйдуць больш за мільён чалавек. Беларусь, безумоўна, з’яўляецца еўрапейскай краінай, і праявіць салідарнасць з еўрапейцамі, канешне, вельмі важна. Але ёсць праблема яшчэ і ў свабодзе слова. Свабода слова — гэта еўрапейская каштоўнасць, якая важная і для нашага грамадства, і для партыі «Зялёныя» у прыватнасці. Беларусы, пэўна, больш за іншых разумеюць, што гэта за каштоўнасць, і нам важна за яе змагаца».