11 палітычных партый і грамадскіх арганізацый пачалі выпрацоўку агульнага рашэння па магчымасцях прыватызацыі ў Беларусі.

Першая сустрэча адбылася 17 снежня ў офісе Беларускай партыі "Зялёныя". У ёй прынялі ўдзел прадстаўнікі Беларускай партыі "Зялёныя", БНФ, БСДП (Грамада), рух "За Свабоду", аргкамітэты па стварэнні "Партыі свабоды і прагрэсу" і "Партыі працы".

"Асноўная задача каардынацыйнай групы - выпрацаваць адзінае рашэнне, сфармуляваць канкрэтныя прапановы па прыватызацыі ў жыллёвай сферы, прыватызацыі зямлі, лясных і водных рэсурсаў, а таксама прыватызацыі прамысловых прадпрыемстваў і іншай дзяржаўнай уласнасці, - распавёў намеснік старшыні БПЗ Дзмітрый Кучук. Вынікам нашай працы мы бачым адзіны дакумент, у якім будуць сфармуляваны канкрэтныя крокі па прыватызацыі ў Беларусі. Пакуль жа гэта была першая сустрэча, дзе мы абмеркавалі фармат і план працы, асноўныя напрамкі, абмяняліся думкамі і праграмнымі напрацоўкамі па тэме.

БПЗ аддае прыярытэт прыроднаму і сацыяльнаму значэнням зямельных, лясных і водных рэсурсаў, якія павінны належаць усяму беларускаму грамадству. І права дзяржаўнай уласнасці на гэтыя рэсурсы - гэта гарантыя абароны правоў кожнага на спрыяльнае навакольнае асяроддзе. Права прыватнай уласнасці на гэтыя рэсурсы нясе ў сабе патэнцыйныя пагрозы паніжэння іх рэсурсна-экалагічнага патэнцыялу з прычыны неабдуманага выкарыстання, абмежавання доступу насельніцтва да тэрыторый агульнага карыстання.

"Аднак мэта агульнага супрацоўніцтва і складаецца ў тым, каб прыйсці да кампрамісу, знайсці аптымальныя рашэнні падчас працы. Мы хочам прапанаваць грамадству сфармуляваныя канкрэтныя крокі - і ўжо яно будзе даваць ацэнку нашых прапаноў і прымаць канчатковае рашэнне аб тым, у якім кірунку рухацца, - пракаментаваў Д. Кучук.

Дадзеная ініцыятыва з'яўляецца часткай праграмы «Паглыблены дыялог», у рамках якой беларускія палітычныя і грамадскія арганізацыі выпрацоўваюць агульную пазіцыю па актуальных для грамадства праблемах. Так, да гэтага моманту працуюць каардынацыйныя групы, куды ўваходзяць прадстаўнікі палітычных партый і грамадскіх арганізацый, па рэфармаванні пенсійнай сістэмы і выпрацоўцы антыкарупцыйнай плятформы.