16-га лістапада Ў Мінску адбыўся Форум"За сацыяльны прагрэс", адным з арганізарараў якога былі Зялёныя.

Удзельнікамі форуму сталі каля 100 актывістаў партый левага толку - «Справядлівы свет», Беларуская сацыял-дэмакратычная партыя (Грамада), Беларуская партыя "Зялёныя", а таксама сябры аргкамітэтаў па стварэнні Партыі працоўных і жаночай партыі «Надзея». На Форуме былі прадстаўленыя незалежныя прафсаюзы накшталт Прафсаюзу металістаў.

Падчас Форуму прадстаўнікі левых дэмакратычных сіл Беларусі далі ацэну вынікам  палітычнага і эканамічнага курсаў ураду краіны, а таксама ў тэксце фінальнай рэзалюцыі намецілі генеральныя мэты беларускіх левых у перыяд да 2020-га году.

На думку левых «у краіне ўзмацняецца сацыяльная няроўнасць. Існуючая сістэма кароткатэрміновых працоўных кантрактаў носіць рабскі характар, прыгнятае і прыніжае працоўных. Сфармаваўся інстытут «набліжаных» да ўлады прадпрымальнікаў...».

Левыя заклапочаныя тым, што дзяржава «мэтанакіравана сыходзіць з сацыяльнай сферы, здымаючы з сябе задачы па сацыяльнай падтрымцы насельніцтва і перакладаючы праблемы на плечы саміх беларускіх грамадзянаў».

Як лічаць удзельнікі форуму, «новая мадэль палітычнага і сацыяльна-эканамічнага развіцця краіны павінна быць накіравана на пастаяннае павышэнне матэрыяльнага і духоўнага ўзроўню жыцця ўсіх членаў грамадства і ажыццяўлення прынцыпаў правоў чалавека і асноўных свабод».

У галіне знешняй палітыкі левыя настойваюць на ўмацаванні «суверэнітэту і нацыянальнай бяспекі Рэспублікі Беларусь, ажыццяўленні міралюбнай і сяброўскай знешняй палітыкі, а таксама на аднаўленні ў поўным аб'ёме нармальных адносін з замежнымі краінамі і міждзяржаўнымі структурамі». 

У фінале Форуму адзінагалосна прынята рашэнне аб стварэнні працуючага на сталай аснове міжпартыйнага круглага стала. У рамках яго працы левыя партыі прафсаюзы  змогуць рэгулярна дзяліцца поглядамі, абменівацца інфармацыяй і рыхтаваць агульныя мерапрыемствы, у тым ліку магчыма і выбарчыя кампаніі. 

Вынікі Форуму каментуе Алег Новікаў, старшыня  БПЗ: "Хаця большасць дэлегатаў ад Зялёных прагаласавала супраць выніковай рэзалюцыі Форуму, палічыўшы яе змест дастаткова памяркоўным, у стратэгічным сэнсе мерапрыемства была вельмі карысным для пачатку дыялогу прадстаўнікоў беларускіх левых. Мяркую, что перспектывы гэтага дыялогу шмат у  чым будуць залежаць ад пазіцыі левых на выбарах 2015-га і 2016-га гг."