Беларуская партыя Зялёных аспрэчвае рашэнне групы ананімных палітыкаў, якія спрабуюць захапіць пост прадстаўніка дэмсілаў Бабруйска ў барацьбе за пасаду адзінага кандыдата ад апазіцыі на выбарах 2015 -га года.

Нагадаем, што 9 -га красавіка прадстаўнікі шэрагу структур палітычных партый Бабруйска паведамілі пра рашэнне выставіць кандыдатам у Адзіныя спадарыню Святлану Грыцэнка.

Такі падыход, на думку БПЗ, цяжка лічыць легітымным, паколькі раней было вырашана выявіць лідэра дэмакратычнага Бабруйска 18- га сакавіка шляхам праймерыз з удзелам шматлікіх лідэраў апазіцыі і грамадзянскай сектара. Зялёнымі ў якасці кандыдата на папярэдняе галасаванне быў заяўлены Юрый Стефанішын - вядомы акіянолаг і выратавальнік рэдкіх жывёл.

Напярэдадні 18- га сакавіка арганізатары праймерыз адмовіліся ад яго правядзення, матывуючы гэта пагрозамі спецслужбаў. Тым не менш, наш кандыдат адмовіўся здымацца з выбараў. Той факт , што арганізатары шоу 9 -га красавіка нават не паведамілі прадстаўнікам штаба Юрыя Стефанішына аб сваіх тусоўках, з'яўляецца грубым парушэннем усіх вядомых дэмакратычных працэдур.

Не кажучы ўжо пра тое, што ніхто не ведае па якім прынцыпе адбывалася абранне спадарыні Грыцэнка і хто наогул ўпаўнаважыў гэтых людзей выбіраць галоўнага дэмакрата Бабруйска. У сутнасці, у дэмакратычнай супольнасці горада на Бярэзіне адбыўся путч.

У сітуацыі, якая склалася Юрый Стефанішын і яго штаб заяўляюць аб тым, што не прызнаюць хунту і патрабуюць правядзення сумленных выбараў кандыдата ад Бабруйска  на выбары Адзінага. Мы прапануем камандзе Грыцэнка сесці за стол перамоваў , распрацаваць схему сумленных і празрыстых выбараў бабруйскага дэмакрата нумар адзін. У адваротным выпадку Юрый Стефанішын пакідае за сабой права публічна аспрэчваць статус Святланы Грыцэнка.

Пра асноўныя тэзісы сваёй праграмы Юрый Стефанішын распавядае тут.

http://www.youtube.com/watch?v=slq2Wed8Adc&feature=youtu.be