Палата прадстаўнікоў на вясенняй сесіі ў першым чытанні плануе разгледзець законапраект «Аб унясенні дапаўненняў і змяненняў у некаторыя законы Рэспублікі Беларусь па пытаннях дзейнасці палітычных партый і іншых грамадскіх аб'яднанняў».
Газета Новы час папрасіла Дзмітрыя Кучука. намесніка старшыні БПЗ пракаментаваць заканадаўчую ініцыятыву.
Намеснік старшыні Беларускай партыі «Зялёныя»Дзмітрый Кучук кажа, што зараз партыю пазбавіць рэгістрацыі сапраўды стане прасцей. «Беларуская экалагічная партыя «Зялёныя» была дэ-факта ліквідаваная таму, што не падавала адпаведных дакументаў аб сваёй колькасці і аб сваёй дзейнасці. Зрэшты, калі праходзіў працэс па яе ліквідацыі ў Вярхоўным судзе, заснавальнікам партыі пра гэта нават не паведамілі. Яны былі зусім не падрыхтаваныя да такога працэсу. Таму такое палажэнне аб «непрадастаўленні» дакументаў з’яўляецца даволі сур’ёзнай пагрозай для існавання партый», — адзначае Кучук.
Ён таксама непакоіцца, што партыю могуць ліквідаваць за «згубленыя» справаздачы, альбо несвоечасовае прадстаўленне такіх справаздач. «Як правіла, суд пры ліквідацыі не разбіраецца, дзе падзеліся справаздачы і чаму яны не паступілі. Для суда яны проста не паступілі — і ўсё, нават калі партыя па сто раз перадавала іх асабіста з рук у рукі адказным чыноўнікам. Баюся, што гэта чарговая схема для ліквідацыі «няправільных» палітычных структур», — кажа Кучук.