12 снежня ў Мінску з удзелам прадстаўнікоў БПЗ адбылося паседжанне круглага стала палітычных партый і грамадскіх аб'яднанняў, прысвечанае пытанням рэфармавання Выбарчага кодэкса.
Нагадаем, што 3 снежня Цэнтравыбаркам накіраваў Аляксандру Лукашэнка анансаваныя падчас парламенцкай кампаніі гэтага года прапановы па зменам у выбарчае заканадаўства
Цэнтральная камісія, у прыватнасці, выступае за пашырэнне магчымасцяў для вылучэння кандыдатаў у дэпутаты Палаты прадстаўнікоў права рэспубліканскім грамадскім аб'яднанням колькасцю больш за тысячу чалавек. На думку Цэнтральнай камісіі, агітацыя за байкот павінна рэгулявацца законам пра масавыя мерапрыемствы. Таксама па меркаванню Цэнтравыбаркаму, падчас агітацыйнай кампаніі можна адмовіцца ад надання кандыдатам бюджэтных сродкаў для друку агітацыйных улётак. Нарэшце ЦВК не бачыць сэнсу ў дэбатах кандыдатаў на радыё. Іх правядзенне плануецца пакінуць толькі на тэлебачанні.
У абмеркаванні паправак апроч сяброў БПЗ прынялі ўдзел прадстаўнікі партыі "Справядлівы мір", Беларускай сацыял-дэмакратычнай партыі (Грамада), кампаніі "говори правду!", Партыі БНФ, руху "За Свабоду", Беларускага кангрэса дэмакратычных прафсаюзаў, кампаніі "За справядлівыя выбары" і аргкамітэта партыі "Беларуская хрысціянская дэмакратыя")
На думку удзельнікаў сустрэчы папраўкі ў Выбарчы кодэкс, прапанаваныя ЦВК, з'яўляюцца дыскрымінацыйнымі ў адносінах да палітычных партый і прыдуманы для таго каб узмацніць уплыў на палітычны працэс праўладнай грамадзянскай арганізацыі "Белая Русь".
У сувязі з гэтым прадстаўнікі партый і рухаў вырашылі настойваць на тым, каб змены ў Выбарчы кодэкс, прапанаваныя Цэнтравыбаркамам, былі накіраваныя на экспертызу ў Бюро па дэмакратычных інстытутах і правам чалавека пры АБСЕ.
Удзельнікі круглага стала дамовіліся стварыць працоўную групу для выпрацоўкі сваяго варыянту змен у Выбарчы кодэкс і аформіць гэтыя прапановы як законапраект. Тэкст праекту будзе распрацаваны да канца году.