Віншуем! Праект “Радыё Рыба”, рэалізаваны ў верасні мінулага году ў Вроцлаве падчас Еўрапейскага кангрэсу культуры (ЕКК) сябрамі Беларускай партыі “Зялёныя”, стаў лаўрэатам сёлетняга конкурса Кангрэса ініцыятыў Усходняй Еўропы (Люблін).
11-13 верасня ў Любліне (Польшча) адбудзецца Кангрэс ініцыятыў Усходняй Еўропы арганізаваны органамі самакіравання Любліна і Люблінскага ваяводства сумесна з польскім офісам Праграмы развіцця ААН (UNDP) і офісам Еўрапейскай Камісіі. Асноўныя палажэнні Кангрэса працягваюць ідэі арганізаванага ў мінулым годзе ў Любліне Кангрэса культуры Усходняга Партнёрства.
Напярэдадні кангрэса адбыўся конкурс на найлепшы праект трансмежнага супрацоўніцтва у якім узялі ўдзел як фармальныя інстытуты (НДО, установы культуры, навучальныя ўстановы, органы рэгіянальнага самакіравання), так і нефармальныя групы мастакоў і грамадскіх дзеячоў, а таксама прыватныя асобы.
Прыемнай нечаканасцю стала навіна, пра тое, што адным з лаўрэатаў конкурсу стаў праект “Радыё Рыба”, рэалізаваны ў верасні мінулага году у Вроцлаве падчас Еўрапейскага кангрэсу культуры (ЕКК).
Праект “Радыё Рыба на Еўрапейскім Кангрэсе Культуры” паўстаў як вынік супрацы паміж рэдакцыяй сайта альтэрнатыўнай культуры “Радыё Рыба” (radioryba.com рэдакцыяй Польскага радыё для заграніцы - з аднаго боку - і польскай недзяржаўнай арганізацыяй Centrum Kultury Revers з Кракава, а таксама беларускай грамадскай арганизацыи Next Stop New Life – з другога боку.
У выніку працы журналістаў на сайце radioryba.com з’явіліся аўдыё рэпартажы з ЕКК, інтэрв’ю з выбітнымі прадстаўнікамі еўрапейскай інтэлектуальнай эліты – рэжысёрам Анджэем Вайдай, сусветна вядомым авангардным мастаком Т’еры Жафруа, французскім філосафам - “гуру сучаснага лібералізму” - Гаем Сорманам, удзельнікамі веснавой рэвалюцыі на егіпецкім пляцу Тахрыр, расейскім пісменнікамі Віктарам Ерафеевым, беларускім электронным музыкам Уладам Бубнам ды шмат з кім яшчэ.
Удзел беларускіх журналістаў у такім маштабным і прэстыжным мерапрыемстве, якім ёсць Еўрапейскі Кангрэс Культуры стаў магчымы дзякуючы перамозе ў конкурсе Art For Social Change (Мастацтва змяняе грамадства), які быў арганізаваны напярэдадні ЕКК Польскім нацыянальным аўдыяінстытутам (NInA). Праект падтрымала таксама НДО SocialCamp Kraków.