Беларуская Партыя "Зялёныя" накіравала ў амбасаду Швецыі ліст ў сувязі з заканчэннем акрэдытацыі дыпламата Стэфана Эрыксана.
У лісце адрасаваным на імя часовага паверанага Шведскага Каралеўства ў Рэспублікі Беларусь сп. Бранте у прыватнасці гаворыцца: “Шаноўны сп. Бранте Ад імя актывістаў Беларускай партыі "Зялёныя" просім Вас перадаць сп. Стэфану Эрыксану нашу падзяку за яго працу на пасту пасла Швецыі ў Беларусі. Дзейнасць сп. Эрыксана на пасту шведскага пасла ў Беларусі заклала падмурак добрых адносін паміж народамі абодвух краін”.
“Акрамя таго цяжка пераацэніць працу сп. Эрыксана ў вобласці папулярызацыі беларускай культуры і мовы. Фактычна сп. Эрыксан заклаў новыя крытэрыі іміджу еўрапейскага дыпламата ў Беларусі. БПЗ выражае нязгоду з фактам заканчэння акрэдытацыі і сп. Эрыксана і мае надзею на яго хуткае вяртанне ў кола сваіх беларускіх сяброў”, - гаворыца ў лісце БПЗ.
Сп. Стэфан Эрыксан працаваў у Мінску з верасня 2005 года. Пры ім амбасада значна пашырыла сваю працу. Эрыксан вольна гаварыў па-беларуску і шмат рабіў для падтрымкі беларускай культуры. Ён асабіста пераклаў на шведскую творы беларускіх літаратараў уключаючы кнігі Васіля Быкава і арганізоўваў канцэрты беларускіх рок-гуртоў у Швецыі.