Нямецкі фонд імя Генрыха Бёля, які працуе пры мясцовай партыі Зялёных, ўзнагародзіў віцэ-прэзідэнта Міжнароднай федэрацыі правоў чалавека, праваабаронцу Алеся Бяляцкага прэміяй Петры Келі.

Прэмія Петры Келі з 1998 года прысуджаецца асобам ці групам асоб за актыўны ўдзел у барацьбе за выкананне праў чалавека, негвалтоўнае вырашэнне канфліктаў і абарону навакольнага асяроддзя. Прэмія была заснавана ў памяць вядомай палітычнай дзяячкі, якая брала ўдзел у стварэнні ў Германіі Партыі Зялёных, Петры Келі (1947–1992).

У апошнія гады ўзнагароды былі ўдастоены расійскі адвакат і праваабаронца Юрый Шміт, кітайскі адвакат Чжан Сычжы, актывістка па абароне правоў чалавека і экалогіі з Кеніі Вангары Маатай, якая пазней стала лаўрэатам Нобелеўскай прэміі міру.

Паводле слоў жонкі Алеся Бяляцкага , пра ўзнагароджанне ёй паведаміў у лісце былы пасол Германіі ў Беларусі Крыстаф Вайль. У лісце адзначаецца, што прэмія прысуджана ў знак прызнання дзейнасці Алеся Бяляцкага ў адстойванні правоў чалавека ў Беларусі.

Акрамя таго дыпламат выказаў надзею, што Бяляцкі зможа атрымаць гэту прэмію ўжо восенню ў Берліне.

Сам Бяляцкі адбывае пакаранне ў бабруйскай папраўчай калоніі. 24 лістапада 2011 года суд Першамайскага раёна Мінска прызнаў Бяляцкага вінаватым ва ўтойванні даходаў у асабліва буйным памеры і прыгаварыў яго да чатырох з паловай гадоў пазбаўлення волі ў калоніі ўзмоцненага рэжыму з канфіскацыяй маёмасці. Падставай для крымінальнага пераследу праваабаронцы стала наяўнасць у яго замежных рахункаў у банках Літвы і Польшчы. Суд не ўзяў пад увагу, што гэтыя грошы выкарыстоўваліся для праваабарончай дзейнасці.

Прэс-служба Беларускай Партыі Зялёных