Дэпутатка  Бундэстагу ад  партыі Зялёных Марылюіза Бэк заявіла пра сваё апякунства над беларускім палітвязнем Ігарам Аліневічам у рамках кампаніі "Шэфства над палітвязнямі".

Гэтую кампанію ініцыявала летась нямецка-швайцарская праваабарончая арганізацыя "Libereco — Partnership for Human Rights".

У сваёй заяве аб апякунстве над Аліневічам Марылюіза Бэк указвае, што яе “падшэфны” быў выкрадзены невядомымі асобамі падчас яго знаходжаньня ў Маскве і быў дастаўлены ў КДБ Беларусі, што ў часе допытаў у дачыненні да падследнага ўжывалі недазволеныя фізычныя і псыхалягічныя захады, што падчас суду, які асудзіў маладога беларуса на 8 гадоў зняволення, назіраліся сур'ёзныя парушэньні канстытуцыйных прынцыпаў.

“Я не падзяляю ідэі "анархістаў" у Беларусі “, – адзначае Марылюіза Бэк.” Тым ня менш, гэтыя людзі маюць права разлічваць на захаванне канстытуцыйных прынцыпаў у разглядзе іх справаў. Улічваючы, што гэта ў Беларусі не выконваецца, я вырашыла стаць яго "апекуном". Я патрабую вызвалення Ігара Аліневіча”.

Раней Марылюіза Бэк была апекуном палітвязьня, экс-кандыдата на прэзыдэнта Андрэя Саннікава.

Мэта кампаніі "Шэфства над палітвязнямі" — забяспечыць кожнаму палітвязню ў Беларусі і яго сям’і маральную ды іншую падтрымку з боку эўрапейскіх палітыкаў. Апекуны бяруць на сябе абавязак сачыць за праблемамі таго ці іншага палітвязня, дапамагаць ягонай сям'і, усяляк распаўсюджваць інфармацыю пра беларускіх палітзняволеных у сваіх краінах.

Беларускія і міжнародныя праваабарончыя арганізацыі лічаць Ігара Аліневіча вязнем сумлення і заклікаюць да яго неадкладнага і безумоўнага вызвалення.

Прэс-служба Беларускай Партыі Зялёных