18-га мая ў Мінску прайшла прэс-канферэнцыя  Зялёных  з нагоды змены партыйнай сімволікі.

30 сакавіка Беларуская партыя "Зялёныя" атрымала пасведчанне пра рэгістрацыю Мінюстам РБ новай партыйнай сімволікі. Рашэнне пра змену сімвала партыі, якім з 1993-го года з'яўляўся белы бусел, было прынята на апошнім з'ездзе ў лістападзе мінулага года. Новая эмблема ўяўляе сабою кампазіцыю на белым фоне, якая складаецца з акружнасці і ўпісанага ў яе схематычнага малюнка жабкі.  

Падчас падрыхтоўкі да з'езду на сайце партыі быў абвешчаны адкрыты конкурс. У яго выніку былі адабраны шэсць варыянтаў эмблем. Напачатку гады Цэнтральны Савет  БПЗ абраў з прапанаваных варыянтаў эскіз знака, які таксама лёг у аснову дызайну сцяга партыі. Пасля шэрагу ўзгадненняў макеты знака і сцяга былі  зацверджаны адпаведнай структурай Мінюста ў якасці новай партыйнай сімволікі.

"На наш густ, папярэдняя сімволіка некалькі састарэла як з эстэтычнай, так і з семантычнай пунктаў гледжання. Сімвалы павінны адказваць патрабаванням сучаснасці і карэляваць з актуальнымі кірункамі дзейнасці партыі. Новая эмблема сімвалізуе неабходнасць выбару шляху ўстойлівага развіцця чалавецтва, як умовы для даўгалецця і паўнавартаснага”, - тлумачыць старшыня БПЗ Алег Новікаў.

Сімвалічны малюнак жабкі нагадвае пра ўнікальную экасістэму беларускіх балот, якія з'яўляюцца лёгкімі Еўропы. Элементы зялёнага колеру ў самым прамым сэнсе злучаны з назвай Беларускай партыі "Зялёныя". Зялёны колер сімвалізуюць надзею, здароўе, адкрытасць, волю, чысціню намераў і памкненняў арганізацыі. Белы колер - колер чысціні, мудрасці і высакароднасці - сімвалізуе дзейнасць партыі на аснове прынцыпаў законнасці, дэмакратычнасці і празрыстасці.

У цэлым жа эмблема сімвалізуе аб'яднанне грамадзян Рэспублікі Беларусь, якія прытрымліваюцца агульных палітычных, сацыяльных і экалагічных поглядаў, словам і справай спрыяльных будаўніцтву Беларусі як дзяржавы вольных людзей, якое зможа забяспечыць сваім грамадзянам права на здароўе, даўгалецце і паўнавартаснае жыццё ў сацыяльным і здароваму асяроддзі.

Прэс-служба Беларускай Партыі “Зялёных”