6-га студзеня, у 35-ю гадавіну стварэння вядомай правабарончай чэхаславацкай арганізацыі Хартыя-77 па ўсім свеце, у тым ліку ў Мінску, прайшлі ўшанаванні памяці нядаўна памерлага чэшскага літаратара і палітыка Вацлава Гавела, аднаго з яе ініцыятараў.

У тым ліку актыўна узгадваюць Вацлава Гавела Зялёныя. Так венгерскія  Зялёныя ў спецыяльнай заяве называюць нябожчыка “сімвалам магчымасці мірнага супраціву дыктатуры”. “Ён (Вацлав Гавел) таксама даў нам прыклад таго, што сапраўдны дэмакрат не толькі супрацьстаіць гвалту, аднак захоўвае моц духа і разумее годнасць дэмакратыі будучы пры ўладзе”, - пішуць венгерскія эколагі. “ Гавел даказаў, што чалавек нават пры ўсіх сваіх унутранных супярэчнасцях здольны мяняць свет. Яго смерць мабілізуе ўсіх, хто падзяляе яго ідэі”, - гаворыцца ў заяве чэшскіх Зялёных. Нямецкія Зялёныя лічаць, што “Васлав Гавел заслужыў самай высокай адзнакі за сваю барацьбу супраць аўтарытарнага камунізма і за адзінства еўрапейскіх народаў”.

Інтарэс Зялёных да постаці Вацлава Гавела тлумачыцца не толькі тым, што ён падзяляў фундаментальныя зялёныя ідэі, напрыклад часта казаў пра пагрозу глабальнага пацяплення. Сам Гавел пачынаючы з 2004-га году адкрыта падтрымліваў на выбарах у Чэхіі мясцовую партыю Зялёных.  ” Я быў Зялёным усё жыццё.Я быў Зялёным яшчэ да таго як нарадзіўся сп. Бурсік ( адзін з цяперашніх лідэраў чэшскіх Зялёных), - казаў экс-прэзідэнт у 2009-ым годзе.

У інтэрнеце можна пабачыць фрагмент адной з сумесных прэс-канферэнцый Вацлава Гавела і кіраўніцтва чэшскіх Зялёных.

Прэс-служба Беларускай Партыі Зялёных