Зміцер Вішнёў, папулярны беларускі літаратар, сябра Зялёных выдаў сваю новую кніжку  “Шоргат жукоў”.

Зміцер Вішнёў – нарадзіўся ў 1973 г. ў Дэбрацэне (Венгрыя), вывучаў філалогію і журналістыку ў Мінску і Маскве. Піша вершы, прозу, крытыку, займаецца жывапісам. Да 2006 года быў кіраўніком перформарнага праекта "Спецбрыгада афрыканскіх братоў".

Ён  аўтар шматлікіх кніг: "Шматбаковы тамтам" (1998), "Тамбурны маскіт" (2001), "Трап для сусліка, альбо Некрафілічнае даследаванне аднаго віду грызуноў" (2002), "Верыфікацыя нараджэння" (2005) і г.д. Зміцер Вішнёў - удзельнік шматлікіх міжнародных паэтычных фестываляў і кангрэсаў. Перакладзены больш чым на дваццаць моваў.

У новую кнігу сп. Вішнёва ўвайшлі тэксты, напісаныя за апошнія некалькі гадоў (2005—2011). Большасць змешчаных у выданні твораў друкавалася ў перыядычым друку: «Новы час», «Дзеяслоў», «Тэксты».

«Шоргат жукоў» — гэта па словах аўтара  чарговая спроба  ўпрыгожыць навакольную прастору.“Навакольная прастора” гэта не толькі прыгожая метафара. Як кажа сам літаратар усе яго творы маюць выразна экалагічны падтэкст. Пра гэта дарэчы сведчаць назвы  тэкстаў: “Па венах градус перапаўзае як гарачы Ташкент”, “Кентаўры ідуць па нашых мокрых слядах” і г.д.

У якасці каментара для сайта БПЗ з нагоды выдання сваёй кнігі сп. Вішнеў проста папрасіў перадаць усім чытачам яго просьбу - “Набываць на Каляды і Новы год выключна штучныя ялінкі”.

Пытайце кнігу “Шоргат жукоў” ва ўсіх кнігарнях!

Прэс – служба Беларускай Партыі “Зялёныя”