Беларуская партыя "Зялёныя" выказвае нязгоду з фарматам падрыхтоўкі і зместам тэксту праекту Закона"Пра абыходжанне з жывёламі", які зараз рыхтуецца ў ПП НС.
Як вядома, у Беларусі адсутнічае Закон "Пра абарону жывёл ад жорсткага абыходжання", хаця падобныя законы ёсць у большасці цывілізаваных краін, ва ўсіх дзяржавах Еўрапейскага Саюзу, ва ўсіх краінах-суседзях Беларусі (акрамя Расіі). Больш таго, у многіх краінах у наш час на змену дзеючым законам пра абарону жывёл ад жорсткага абыходжання прыходзяць законы другога пакалення: "Пра дабрабыт жывёл". Нават у Расійскай Федэрацыі цяпер рыхтуецца адносна гуманны праект Закона "Пра адказнае абыходжанне з жывёламі".
На гэтым фоне беларускае заканадаўства выглядае безнадзейна адсталым. Праект, які зараз рыхтуецца, не вырашае праблему абароны жывёл ад жорсткага абыходжання. Насупраць, праект утрымлівае новыя драконаўскія абмежаванні для ўладальнікаў жывёл, узмацняе іх юрыдычную адказнасць, а таксама капіюе цяпер дзейсныя падзаконныя нарматыўныя акты, якія насамрэч вельмі далёкія ад прынцыпаў гуманнасці. Усё гэта здольна прывесці да новай хвалі жорсткага забойства "незаконных" і безнаглядных жывёл, што ў сваю чаргу будзе мець адмоўныя і небяспечныя для грамадства наступствы.
Праект Закона "Пра абыходжанне з жывёламі" рыхтуецца з відавочнымі парушэннямі міжнародных абавязкаў Беларусі, напрыклад, Орхускай канвенцыі, якая патрабуе абвязковага грамадскага ўдзелу пры падрыхтоўцы юрыдычных экалагічна значных дакументаў. Праект рыхтуецца без шырокага грамадскага абмеркавання і практычна без удзелу прадстаўнікоў грамадскіх аб'яднанняў.
Мы прапануем дапусціць прадстаўнікоў Беларускай партыі "Зялёныя" і зацікаўленых грамадскіх аб'яднанняў у склад працоўнай групы па падрыхтоўцы праекта Закона і ўнесці ў тэкст праекта нормы, здольныя забяспечыць у Беларусі рэальную абарону жывёл ад жорсткага абыходжання.
Адначасова ад імя Беларускай партыі "Зялёныя" на адрас сп. Сяргея Конопліча, старшыні пастаяннай камісіі Палаты прадстаўнікоў Нацыянальнага сходу Рэспублікі Беларусь па праблемах чарнобыльскай катастрофы, экалогіі і прыродакарыстанню накіраваны ліст.
Прыводзім яго змест:
Старшыні камісіі Палаты прадстаўнікоў Нацыянальнага сходу Рэспублікі Беларусь па праблемах чарнобыльскай катастрофы, экалогіі і прыродакарыстанню
220010, Рэспубліка Беларусь, г. Мінск, вул. Савецкая, 11 (Дом ўраду)
Паважаны Сяргей Міхайлавіч!
Дадзены ліст складзены ў каардынацыі з Грамадскім аб'яднаннем "Экодом", з якім мы маем агульныя намеры па наступным пытанні.
Зараз Ваша камісія рыхтуе праект Закона "Пра абыходжанне з жывёламі". У адпаведнасці з артыкулам 8 Канвенцыі "Пра доступ да інфармацыі,удзелу грамадскасці ў прыняцці рашэнняў і доступе да правасуддзя па пытаннях, якія тычацца навакольнага асяроддзя" (Орхуская канвенцыя) Рэспубліка Беларусь абавязана забяспечыць "эфектыўны ўдзел грамадскасці на адпаведным этапе, пакуль застаюцца адкрытымі магчымасці для выбару, у падрыхтоўцы дзяржаўнымі органамі нарматыўных палажэнняў, што маюць непасрэдную выканаўчую сілу, і іншых юрыдычна абавязковых правіл, якія могуць аказаць істотнае ўздзеянне на навакольнае асяроддзе".
Выяўляем сваю зацікаўленасць ва ўдзеле ў падрыхтоўцы праекта Закона "Пра абыходжанне з жывёламі". Просім Вас надаць нам актуальны працоўны варыянт тэксту законапраекта і забяспечыць сталы кантакт у працоўным парадку паміж кваліфікаванымі экспертамі Беларускай партыі "Зялёныя" і Грамадскага аб'яднання "Экодом" (2-3 чалавекі) і сябрамі Вашай працоўнай групы па падрыхтоўцы дадзенага законапраекта.
Гатовыя абмеркаваць Вашы прапановы па каардынацыі нашых сумесных дзеянняў з мэтай падрыхтоўкі найбольш якаснага тэксту законапраекта.
Крыніца: Прэс-служба Беларускай Партыі “Зялёныя”.