Беларуская партыя Зялёныя занепакоена фактамі прымусовага запісу настаўнікаў у праўрадавыя партыі.
Выбарчая кампанія ідзе поўным ходам. Акруговыя выбарчыя камісіі сфармаваны, скончылася рэгістрацыя ініцыятыўных груп патэнцыйных кандыдатаў у дэпутаты ПП НС. Кампанія, у прынцыпе, толькі пачалася, а парушэнняў і актаў беззаконня ўжо звышдастаткова.
Напрыклад, службоўцы аддзелаў адукацыі наведваюць школы, дзе масава запісваюць настаўнікаў у прадзяржаўныя партыі накшталт "Беларускай сацыяльна-спартовай партыі" ці "Рэспубліканскай партыі працы і справядлівасці".
Робіцца гэта з меркаванняў таго, што (як заяўляюць самі ж "агітатары") "назіральнік-настаўнік" - гучыць не вельмі прэстыжна, а вось "сябра партыі" - зусім іншая справа.
Такім чынам, улады збіраюцца прадэманстраваць, што сярод назіральнікаў на парламенцкіх выбарах будуць прысутнічаць не толькі прадстаўнікі працоўных калектываў і праўладных грамадскіх арганізацый, але і прадстаўнікі шматлікіх палітычных партый.
Варта адзначыць усім вядомы факт, што настаўнікі - адна з самых неабароненых у прафесійным плане катэгорый у Беларусі. Існуе кантрактная сістэма (т.зв. "кругавая парука"). Нейкай праява пратэсту і настаўнік звольнены. У такім выпадку знайсці новае месца працы, прынамсі, у тым жа самым горадзе ці раёне практычна немагчыма. Вельмі важную ролю пры гэтым гуляе ўнутрыкарпаратыўная інфармацыя: калі горад ці раён не вялікі, тое ўсё пра ўсіх, як правіла, усё ведаюць.
Настаўнікі і наёмныя супрацоўнікі дзяржсектара, якія адважваюцца не выконваць "просьбы" адміністрацыі, трапляюць у "чорны спіс" і па канчатку кантракту звальняюцца без тлумачэння чыннікаў. Гэта і дазваляе ўладам выкарыстоўваць педагогаў як заўгодна. Улады абгрунтуюць гэта па прынцыпе "а куды яны дзенуцца?!". А ўлічваючы, тое, што настаўнікі пераважна жанчыны і, як правіла, маці-адзіночкі, апошнія гатовыя выконваць усе "рэкамендацыі" кіраўніцтва.
Прымусова запісваючы настаўнікаў у праўрадавыя партыі, улады ствараюць такім чынам выгляд дэмакратыі, напаўняючы ўчасткі менавіта "партыйнымі" назіральнікамі, паколькі "вылучэнцы ад грамадскіх арганізацый" падчас мінулых выбарчых кампаній не забяспечылі патрэбнай лаяльнасці. Іншымі словмаі ствараецца ілюзія актыўнага партыйнага жыцця. Магчыма гэта свайго роду тэст на новую мадэль змяшанай сістэмы выбараў?
Беларуская партыя Зялёныя заклікае Беларускі прафсаюз працаўнікоў адукацыі і навукі абараніць правы настаўнікаў, сяброў прафсаюзу, якімі ў добраахвотна-прымусовым парадку запісаныя практычна ўсе працаўнікі гэтай сферы!
А непасрэдна саміх настаўнікаў і навукоўцаў заклікаем уступаць у нашу (афіцыйна зарэгістраваную) партыю. Мы назаўжды вызвалім Вас ад неабходнасці ўступу ў іншыя партыі.