Беларуская Партыя Зялёных (БПЗ) накіравала кіраўніцтву партыі Справядлівая Расія ліст, у якім выражае салідарнасць з удзельнікамі грамадзянскіх пратэстаў у Расіі супраць фальсіфікацыі выбараў мэра Астрахані.

Нагадаем, што 16 сакавіка экс-кандыдат ў мэры Астрахані, абласны кіраўнік партыі "Справядлівая Расія"  Алег Шеін і шэраг яго прыхільнікаў абвясцілі бестэрміновую галадоўку пратэста. Па дадзеных выбаркаму, на выбарах мэра перамог адзінарос Міхаіл Столяраў, які набраў 60% галасоў. Аднак, па дадзеных экзітполаў, на выбарах з вялікім адрывам лідыраваў Шеін, які па выніках афіцыйных дадзеных набраў усяго 30% галасоў.

Кіраўніцтва  БПЗ ведае Алега Шеіна не толькі як аднаго з вядучых сацыяльных актывістаў у РФ, але  таксама як аднаго з самых сумленных расейскіх палітыкаў. Дастаткова ўзгадаць, што Алег Шеін тройчы абіраўся ў Дзярждуму, не валодаючы адміністрацыйным рэсурсам і пратэкцыяй бізнэс структур.

" Мы лічым, што акцыі ў Астрахані з'яўляюцца прыкладам грамадзянскай сталасці і пэўныя, што яны карыстаюцца падтрымкай ў шматлікіх беларусаў”,- гаворыцца ў лісце Зялёных на адрас “эсераў”.

БПЗ спадзяецца, што “федэральныя і рэгіянальныя ўлады прыслухаюцца да патрабаванняў партыі Справядлівая Расія і пратэстуючых у Астрахані, зробяць усё для абароны ў краіне інстытуту сумленных і празрыстых выбараў"

Прэс служба Беларускай Партыі Зялёныя