Брудная яна не толькі з-за уцечкі мазута з ЦЭЦ, але таксама і з-за паводзін чыноўнікаў

Як высвятляецца на днях Жодзінскай ЦЭЦ адбылася ўцечка масла ў вадасховішча.  Хаця дакладнай даты аварыі ніхто не ведае, на сёняшні дзень значная частка вадаёма заліта мазутам.

«Лёд на гэтай тэрыторыі набыў характэрны жаўтлявы колер. Пацярпела і частка сушы. Рабочыя Жодзінскай ЦЭЦ па меры магчымасці імкнуцца прыбраць алей, ліквідаваць наступствы аварыі. Забруджаны снег рыдлёўкамі прыбіраюць у вёдры і выносяць у пагрузчык, які стаіць на беразе», - паведамляе незалежны жодзінскі сайт (Zhodzina.by).

На забруджаным беразе размяшчаецца будынак Жодзінскага цэнтра гігіены і эпідэміялогіі, аднак ніякіх афіцыйных апавяшчэнняў з нагоды таго, што здарылася ад гэтай арганізацыі, у абавязкі якой уваходзіць рэагаванне на падобныя сітуацыі, не паступала.  

Толькі пасля візіту журналіста на месца здарэння і запыту у адпаведную інстанцыі галоўны  эколаг па Жодзіна і Смалявіцкаму раёну Аляксандра Вінікава паведаміла: “Учора каля 13 гадзін кіраўніцтва ЦЭЦ паведаміла аб тым, што здарылася. У цяперашні час вядуцца працы па ліквідацыі наступстваў уцечкі алею. Будуць устаноўлены буйкі, праводзіцца аналіз вады. Аб магчымых наступствах таго, што здарылася можна будзе казаць не раней, чым пасля правядзення аналізаў і неабходных даследванняў”.

Неабходна нагадаць,што згодна з арт.12 Закона РБ «Аб ахове навакольнага асяроддзя» «Правы і абавязкі грамадзян у галіне аховы навакольнага асяроддзя", "кожны грамадзянін мае права на спрыяльнае навакольнае асяроддзе і на пакрыццё шкоды, прычыненай парушэннем гэтага права, а таксама на атрыманне, захоўванне і распаўсюджванне поўнай, дакладнай і своечасовай экалагічнай інфармацыі ".

Каментарый Яўгена Герасіменка, актывіста Жодзінскай першаснай арганізацыі Беларускай партыі “Зялёныя”: “Гэта аварыя прамы доказ разгільдзяйства дзяржаўных службаў экалагічнай бяспекі. Прабачце, але калі пад носам у Жодзінскага цэнтра гігіены і эпідэміялогіі знаходзяцца плямы разлітага мазута цягам некалькі тыдняў, а яны “хоць бы хны”, то аб якім экалагічным даглядзе на высокім узроўні і шчырасці чыноўнікаў можна гаварыць, калі справа будзе кранаць такія маштабныя аб'екты як “Беларуска-кітайскі тэхналагічны парк” і раку Волма з яе запаветнымі тэрыторыямі?

Тое, што здарылася ў маім родным горадзе  цалкам адлюстроўвае існуючыя сістэмы утайвання інфармацыі аб экалагічных здарэннях на ўзроўні чыноўнікаў. Застаецца толькі здагадвацца - ці сапраўды бяспечныя тыя вадастокі з ЦЭЦ, што наўпрос уліваюцца тонамі ў Плісу. Дарэчы, жодзінцы, калі плаваюць бліз стокаў ЦЭЦ, цешацца цеплынёй вады, не ўяўляючы патэнцыйнай пагрозы. Нават і назва ёсць гэтага пляжу - “Цяплушка”.

Вось так, дзякуючы намаганням  Zhodzina.by  і мясцовым рыбакам мы зараз маем інфармацыю пра гэтае здарэнне. А калі ўлічыць мажлівасць утойвання інфармацыі, ва ўмовах адсутнасці грамадзкай ініцыятывы, то цяжка, нават і ўявіць, што  магло б здарыцца далей падчас разгару купальнага сезону”.

Крыніца: Прэс-служба Беларускай Партыі «Зялёныя»