Беларуская Партыя Зялёныя, сябры Беларуска-індзейскага таварыства і грамадскага Цэнтра лацінаамерыканскай культуры ў Гомелі заклікаюць беларусаў падпісаць петыцыю ў абарону правоў індзейцаў племені апачаў з рэзервацыі Сан-Карлас (San Carlos Apache Tribe, штат Арызона, Злучаныя Штаты Амерыкі).

Зараз урад ЗША мае намер дазволіць кампаніі "Рэзальюшн-копер" з гіганцкай карпарацыі "Рыа-Цінта" (Resolution Copper, Rio Tinto)  здабычу карысных выкапняў у частцы Нацыянальнага лесу Тонта, вядомай як Оўк-Флэт (Oak Flat), што здаўна лічыцца свяшчэннай у карэнных жыхароў. Пагроза некранутасці гэтага важнага цырыманіяльна-пахавальнага месца выклікала пратэст апачаў і сусветнай грамадскасці.

Ініцыятары збору подпісаў "Кангрэс ЗША: выратуйце Оўк-Флэт" - "Членам Кангрэса ЗША і міністру унутраных спраў Салі Джуэл" (Members of the US Congress and Interior Secretary Sally Jewell) - у сваім звароце падкрэсліваюць: "Шматлікія ўрады свету маюць сумны вопыт парушэння правоў карэнных народаў. Але калі звязаныя з горназдабываючай прамысловасцю амерыканскія заканадаўцы вакольнымі шляхамі аформілі дазвол на правядзенне здабычы выкапняў, апачы сталі змагацца. Іх барацьба пачала прыносіць вынікі: Кангрэс ЗША ўжо разглядае пытанне аб прыпыненні праекта”.
На думку праціўнікаў карпарацый, пры своечасовай падтрымцы патрабавання індзейцаў дастатковай колькасцю людзей "моц нашых галасоў зможа дапамагчы ім захаваць сваю спадчыну. Гэта таксама стане выразным сігналам ўрадам па ўсім свеце пра тое, што землі карэнных народаў і іх культура не падлягаюць продажу”.

Падтрымаць пратэст можна праз Інтэрнет – петыцыю па наступным адрасе:
https://secure.avaaz.org/ru/stand_with_the_apache_global_loc/?fCDIOib&pv...
- падпішыце прама цяпер.