17 лютага ў Мінску адбылася сустрэча прадстаўнікоў Беларускай партыі зялёных, Беларускай партыі левых “Справядлівы свет”, Беларускай сацыял-дэмакратычнай партыі (Грамады), аргкамітэта Беларускай партыі працы, а таксама незалежных прафсаюзаў і грамадзянскіх ініцыятываў (праект “Прасвет”, Федэрацыя анархістаў).
Удзельнікі сустрэчы абмяняліся думкамі аб цяперашняй сітуацыі ў краіне, аб тэндэнцыях ў лагеры апазіцыі і планах дзеянняў левых сілаў на маючых адбыцца мясцовых і прэзідэнцкіх выбарах. Канстатаваўшы неабходнасць шырокай мабілізацыі людзей наёмнай працы супраць антысацыяльнай палітыкі ўладаў, відавочны ідэйны крах неаліберальнай альтэрнатывы, удзельнікі сустрэчы аднадушна выступілі за пачатак дыялогу беларускіх левых.
Вынікам сустрэчы стала дамоўленасць аб супольным удзеле ў першамайскіх акцыях, аб стварэнні гэтак званага кальца левых медыярэсурсаў, правядзенні форуму левых сілаў. Таксама ўдзельнікі сустрэчы абмеркавалі пытанне аб фармаце міжпартыйнай і грамадзянскай платформы, на базе якой было б магчымае вылучэнне адзінага левага кандыдата на прэзідэнцкіх выбарах 2015 года.
Прадстаўнікі партый і рухаў дамовіліся ў самы бліжэйшы час прадоўжыць кансультацыі, накіраваныя на інтэграцыю левага крыла дэмакратычнага руху Беларусі.
Па словах аднаго з арганізатарў сустрэчы, старшыні БПЗ Алега Новікава “Падобны дыялог вельмі патрэбны хаця б з прычыны таго, што будзе спрыяць росту ідэйнай свядомасці кіраўніцтва левых партый , дапаможа надаць выбарам характар барацьбы праграм, а не грошаў і харызмаў, не дазволіць рознага кшталту папулістам так проста як раней выкарыстоўваць актыў левых арганізацый для сваіх акцый.
Што тычыцца адзінага левага кандыдата, то гэта тэма толькі ўзнікла ў павестцы дня. Аднак, здаецца, усе прысутныя адзначылі агучаны на сустрэчы тэзіс прадстаўніка групы “Прасвет”, які звярнуў увагу на наступны момант: нават прайграючы выбары правыя і ліберальныя сілы навучыліся выкарыстоўваць іх для пашырэння свайго ідыялагічнага плацдарма ў грамадскай дыскусіі. Чаму левыя не могуць зрабіць тое ж самае?”.