Гомельскія зёлныя заклікалі набываць на Новы год не жывыя, а  штучныя ялінкі. У рамках партыйнай палемікі Яўген Герасіменка, сябра БПЗ, прапануе свой погляд на гэтую праблему. У тэксце захаваны арыгінал правапісу аўтара

Здаецца, мы надаем даволі вялікую ўвагу тэме навагодніх ялінак, але я не магу абмінуць гэтую тэму і не выказаць сваю думку, падмацаваную меркаваньнем вядучых эколагаў Беларусі, Расеі і Еўрасаюзу.

Акурат перад навагоднімі сьвятамі пытаньне пра тое, якую абраць калядную елку (жывую ці пластыкавую), паўстае кожны год. Акрамя простых жыхароў спрачаюцца на гэту тэму і эколагі, і цягнуцца гэтыя спрэчкі ўжо не адно дзесяцігодьдзе.

Даруйце мне маю “суб’ектыўнасць”, але я належу да лагера тых, хто аддае перавагу жывым елкам. Зразумела, што толькі тым дрэвам, якія здабыты не браканьерскім спосабам, а вырошчваюцца  лесагаспадаркай краіны ў спецыяльна вызначанных зонах, такіх як, напрыклад, прасека пад лініямі электраперадачы.

Акрамя этычнага паходжаньня мяне клапаціць і пасьлядоўная пераапрацоўка гэтай карыснай сыравіны. То бок неабходна наладзіць працэс збору скарыстаных елак пасьля сьвятаў,  як гэта робіцца ва ўсіх еўрапейскіх гарадах, але ў нас, нажаль, падобных механізмаў пакуль няма. Затое пры адсутнасьці збору пластыкавых ды жывых ялінак, якія, як і ўсё ў нашай краіне, ідуць у сьметніцу, каэфіцэнт негатыўнага ўздзеяньня ад пластыкавых падвышаецца імаверна.

Апошні палемічны аспект, які не дае спакою значнай колькасьці тых скептыкаў, што адстойваюць распаўсюд пластыкавых елак – гэта пытаньне пра вялікія і старыя дрэвы, якія ўсталёўваюць на плошчах у гарадах. На маю думку, зусім не праблематычна з колькасьці запланаванай вырубкі з мэтай загатоўкі піламатэр’ялаў вылучыць пэўныя прыгажуньні дзеля размяшчэньня на плошчы, а потым, як і мае быць, пераапрацаваць іх на мэблю, дошкі, фанэру і г.д.

Напрыканцы, хацелася б далучыцца да словаў Юрыя Глушакова пра неабходнасць больш пільнай увагі да ляснога багагацьця краіны, так як з гэтымі справамі ў нас вялікія праблемы, пра што сведчаць шматлікія доказы незаконных рубак ва ўсіх рэгіёнах Беларусі.

Прэс-служба Беларускай Партыі Зялёных