11 студзеня Цэнтрвыбаркам адмовіў прадстаўнікам шэрагу беларускіх палітычных партый і грамадскіх аб’яднанняў сярод якіх БПЗ правесці грамадскае абмеркаванне прапаноў аб унясенні паправак у выбарчае заканадаўства.
Заява аб правядзенні грамадскага абмеркавання паправак у выбарчае заканадаўства была падпісана шэрагам партый у тым ліку Беларускай партыяй «Зялёныя».
Падпісанты заявы лічаць, што шэраг выпрацаваных ЦВК прапаноў «патрабуюць сур’ёзнага і грунтоўнага абмеркавання з зацікаўленымі бакамі», а «мэтазгоднасць некаторых з апублікаваных прапаноў выклікае сур’ёзныя сумненні».
У прыватнасці, лічаць яны, патрабуюць абмеркавання: прапанова аб наданні права вылучэння кандыдатаў у дэпутаты рэспубліканскім грамадскім аб’яднаннем з колькасцю членаў не менш як 1.000 чалавек; адмова ад дзяржаўнага фінансавання расходаў на перадвыбарную агітацыю і перавод яе поўнасцю на забеспячэнне за кошт перадвыбарных фондаў; ідэя выключыць агітацыю за няўдзел у выбарах з катэгорыі перадвыбарнай агітацыі.
Апазіцыйныя структуры прапанавалі апублікаваць у СМІ тэкст прапаноў аб унясенні зменаў у Выбарчы кодэкс; правесці грамадскае абмеркаванне прапаноў, у тым ліку праз арганізацыю грамадскіх слуханняў з удзелам дзяржаўных органаў, палітычных партый і рэспубліканскіх грамадскіх аб’яднанняў; накіраваць прапановы на экспертызу ў БДІПЧ АБСЕ і Венецыянскую камісію Савета Еўропы.
У адказе на прапанову, падпісаную кіраўніком ЦВК Лідзіяй Ярмошынай, адзначаецца, што «праект нарматыўнага прававога акта можа быць вынесены на публічнае (усенароднае, грамадскае ці прафесійнае) абмеркаванне на падставе рашэння дзяржаўнага органа (службовай асобы), упаўнаважанага прымаць (выдаваць) нарматыўныя прававыя акты. У адпаведнасці з законам Цэнтральная камісія не з’яўляецца такім органам».
Акрамя таго, заявілі ў ЦВК, заканадаўства Беларусі не прадугледжвае правядзенне экспертызы законапраектаў БДІПЧ АБСЕ і Венецыянскай камісіяй.