Беларускае Радыё Рацыя прысвяціла матэрыял акцыі гомельскіх Зялёных супраць высечкі ёлак на Новы год.

Радыё паведамляе:

Гомельскія актывісты Беларускай партыі “Зялёныя” заклікаюць гараджан набываць штучныя елкі. Такім чынам, лічаць экапартыйцы, у беларускіх лясах захаваюцца жывыя дрэвы. Як распавёў гомельскі прадстаўнік “зялёных” Пётр Філон, інфармацыю з просьбай аддаць на святы перавагу ненатуральным елкам распаўсюджваецца ў сацыяльных сетках і непасрэдна сярод гараджан.

Пётр Філон:

- Ва ўсім свеце “зялёныя” выказваюцца пра непажаданасць высечкі жывых дрэваў у навагоднія святы. Таму што гэта наносіць вялікую шкоду лесу. Акрамя гэтага, яшчэ ўзнікае праблема з наступнай утылізацыяй елак. Такі падыход культывуе неэкалагічнае мысленне і ў грамадзянаў, і, у першую чаргу, у моладзі. Адпаведна, лепей для калядных святаў выкарыстоўваць штучныя елкі.

Гомельскія актывісты партыі “Зялёныя” праводзяць адмысловае апытанне сярод карыстальнікаў сацыяльных сетак наконт выкарыстання штучных і натуральных елак. Большасць апытаных – 78% -- аддаюць перавагу штучнаму навагодняму дрэву.

Прэс-служба Міністэрства лясной гаспадаркі паведамляе, што сёлета адмыслова для навагодніх святаў нарыхтавана 170 тысячаў хвойных дрэўцаў. За елачку вышынёй да 1 метра у сярэднім трэба будзе заплаціць каля 30 тысячаў рублёў. Елка вышынёй ад двух да трох метраў будзе каштаваць недзе 60 тысячаў беларускіх рублёў.

Прэс-служба Беларускай Партыі Зялёныя