БПЗ павінна ўстрымацца ад падпісання тз. Віленскага мемарандума пра каардынацыю апазіцыйных сіл на базе БНР. Такая агульная пазіцыя Алега Новікава ( старшыня БПЗ) і Юрыя Глушакова (першы намеснік старшыні БПЗ).

На іх погляд цяперашні ідэалагічны фармат гэтай ініцыятывы прымушае сумнявацца ў тым, што праект Івонкі  Сурвіллы ( старшыня Рады БНР) сапраўды з'яўляецца выразнікам ідэй і прынцыпаў аўтараў Беларускай Народнай Рэспублікі

Нагадаем, што 3-га лістапада ў Вільні шэрагам лідараў беларускіх апазіцыйных структур быў падпісаны  "Выніковы Мемарандум Аб захадах для забеспячэння незалежнасці Беларусі". Адпаведна тэксту заявы  "Прадстаўнікі беларускай палітычнай і грамадзянскай супольнасці прызнаюць Раду БНР рэзервовым палітычным дэпазітарам беларускай незалежнай дзяржаўнай традыцыі",

На думку Зяленых т.з “дэпазітар” не можа прыкрывацца брэндам БНР паколькі не  мае і з ёй нічога агульнага.  Так, статутныя матэрыялы БНР у першую чаргу дэкларуюць сацыялістычны характар гэтага дзяржаўнага праекту  аж да сацыялізацыі прадпрыемстваў і забароны прыватнай уласнасці на зямлю. Цяперашняя структура, якая называе сябе БНР,   паслядоўна ігнаруе сацыяльную тэматыку, што можа разглядацца як сведчанне яе адрыву ад як ад беларускай рэальнасці, так і ад ідэйнай спадчыны БНР.

Такім чынам, цяперашняя т.зв. "Рада БНР" уяўляе з сябе арганізацыю кансерватыўна-ліберальнага накірунку, якая адышла ад ідэалаў Беларускай Народнай Рэспублікі. Акрамя гэтага хапае праблем, якія ўскладняюць прызнанне правамоцтваў гэтай структуры як юрыдычнага, так і палітычнага характару.

Але самае важная, на думку лідараў БПЗ, праблема заключаецца ў тым, што згуртаванне незалежных грамадскіх ініцыятыў і палітычных партый вакол эмігранцкіх структур можа сведчыць толькі пра крызіс цяперашніх лідараў апазіцыйнага руху. Апошняе  ў сваю чаргу дае вельмі зручную нагоду іх супернікам казаць пра тое, што ўсярэдзіне краіны цяперашнія правадыры апазіцыі не маюць ніякай апоры.

Будучыня незалежнай Беларусі ляжыць не за яе межам. Будучыня  - ў здольнасці даць адказ на найважныя сацыяльныя, эканамічныя і экалагічныя пытанні ў самай краіне, у цеснай сувязі з галоўнымі патрабаваннямі беларускага народа.   

Прэс-служба Беларускай Партыі Зяленых