Нямецкая фірма Enertrag адмовілася будаваць першы прамысловы ветрапарк у Беларусі.
Нямецкая кампанія за кошт уласных сродкаў мела намер пабудаваць у Дзяржынскім раёне прамысловы ветропарк магутнасцю да 160 Мвт. Кошт праекта складаў каля 360 млн еўра. Інвестыцыйная дамова пра будаўніцтва ветрапарка Мінскі аблвыканкам і нямецкая кампанія Enertrag падпісалі ў ліпені 2010г.. Чакалася, што праект будзе рэалізаваны ў 2012 году.
Рэалізацыя праекта застапарылася, калі справа дайшла да ўзгаднення ў Мінабароны, дзе заявілі, што "вятракі" вышынёй каля 200 метраў могуць парушыць працу радараў, якія размяшчаюцца недалёка ад Койданава, а гэта змяншае эфектыўнасць працы сістэм ППА і можа негатыўна адбіцца на абараназдольнасці краіны.
Каментар Алега Новікава, сябра БПЗ, які ў рамках журналісцкай дэлегацыі, наведаў галаўны офіс кампаніі Enertrag ў 2010-ым.
Алег Новікаў: "Гэта вельмі сумная навіна. Падчас візіту на фірму мы былі сапраўды ўражаныя - якую увагу надаюць менеджэры Enertrag праекту ў Беларусі. Яны разглядалі будаўніцтва ветрапарку пад Дзяржынскам як нейкі прарыў. Па іх словах ветрапарк пад Дзяржынскам лабіравалі ледзь не на ўзроўні прам'ер-міністра зямлі Брандэнбург (тут знаходзіцца штаб-кватэра кампаніі).
Як след кампанія нават дамаўлялася з беларускімі акадэмічнымі ўстановамі наконт падрыхтоўкі кадраў для абслугоўвання станцыі. Па сутнасці гэта быў шанец як для немцаў так і для беларусаў. Цяпер пасля гісторыі з Enertrag цяжка сказаць- якая замежная кампанія пагадзіцца ў такім маштабе інвеставаць у будаўніцтва ветраных паркаў ў Беларусі. А калі і пагадзіцца, ці будзе яна ставіцца да праекту так сур'ёзна, адказна і комплексна як Enertrag? ".