Зялёныя віншуюць левую грамадскасць з юбілеем стварэння Федэрацыі Анархістаў Беларусі (ФАБ)
Роўна 20 год назад 1-га жніўна 1992-га году ў Мінску была заснаваная Федэрацыя Анархістаў Беларусі. Такім чынам праз амаль 70 год пасля таго як бюраратычным рэжымам былі знішчаныя апошнія гурткі анархічнага руху, адбылося адраджэнне беларускага анархізму. Не гледзячы на тое, што ў сілу шэрагу фактараў ФАБ праіснавала прыкладна дэкаду, Федэрацыя паспела гучна заявіць пра сябе ў розных сферах.
Актывісты ФАБ стаялі каля вытокаў стварэння беларускага антыфашысцкага ( рок-фестываль “Раздавім фашысцкую гадзіну”) экалагічнага ( анты-атамная кампанія “Вясёлка”), і сацыяльнага ( Саюз беспрацоўных) рухаў, студэнцкіх прафсаюзаў (Свабодны прафсаюз студэнтаў), правабарончага сектару ( беларуская секцыя Міжнароднай амністыі), Заўважнае месца ў гісторыі сучаснай альтэрнатыўнай культуры Беларусі займае праект сатырычнай газеты “Навінкі”, якую таксама выдавалі “фабаўцы” На базе Навінак таксама былі знятыя незалежныя фільмы накшталт “Случай з пацаном”, “Гуй бай, бацька” і інш.
Аднак самым галоўным дасягненным ФАБ стаў сам факт стварэння новага левага антыўтарытарнага полюса ў беларускай палітычнай прасторы. ФАБ пры ўсіх сваіх унутраных арганізацыйных слабасцях і ідэйных супярэчнасцях, не маючы ніякага матэрыяльнага рэсурсу, упершыню прапанавала грамадству сацыяльны праект, пабудаваны на прынцыпах справядлівасці і самакіравання.
Беларускія Зялёныя, не будучы стоадсоткавымі прыхільнікамі праграм ФАБ, вызнаюць ролю Федэрацыі і ў фармаванні беларускага прагрэсіўнага сацыяльнага руху, і віншуюць левую грамадскасць Беларусі і усіх, хто калісьці быў сябрам гэтай арганізацыі, з святам.