24 ліпеня ў сілу ўступае закон «Аб унясенні змяненняў і дапаўненняў у Кодэкс аб шлюбе і сям'і».
Вялікая ўвага ў ім нададзена выяўленню і ўліку думкі дзіцяці па важных для яго пытаннях.
Меркаванне дзіцяці будзе ўлічвацца пры разглядзе пытанняў, якія тычацца яго зносін з бацькамі, пазбаўленымі бацькоўскіх правоў, аднаўлення іх у правах, перадачы ў прыёмную сям'ю ці дзіцячы дом сямейнага тыпу, а таксама пры выбары апекуна і папячыцеля.
У адпаведнасці са зменамі ў Кодэкс пры скасаванні шлюбу органы апекі і папячыцельства па месцы жыхарства дзіцяці павінны будуць высветліць, з кім ён аддае перавагу ў далейшым пражыванни, і падаць гэтую інфармацыю ў суд. Сёння часцяком для выяўлення думкі дзіцяці яго запрашаюць на судовыя паседжанні і пытаюцца пра гэта наўпрост, што, можа яго траўмаваць.
Упершыню прадугледжана ўлічваць меркаванне дзіцяці, які дасягнуў 10 гадоў, пры вызначэнні ў судзе парадку зносін з ім дзядуляў і бабуль, калі бацькі, апекуны і папячыцелі адмовілі ім у магчымасці бачыцца з дзіцём.
Таксама ўпершыню ўводзіцца норма аб тым, што рэчы індывідуальнага карыстання непаўналетніх дзяцей - асабістыя рэчы, кнігі, падручнікі, музычныя інструменты, адзенне і гэтак далей - у выпадку скасавання шлюбу не ўлічваюцца пры падзеле маёмасці і перадаюцца без кампенсацыі таму, з якім будуць жыць дзеці.
Акрамя таго, змяняецца парадак разліку запазычанасці па аліментах. Зараз пры разліку запазычанасці судовы прадстаўнік зыходзіць з сярэдняй заработнай платы для мясцовасці, у якой пражывае даўжнік. Аднак часцяком дзіця пражывае ў адной мясцовасці, а плацельшчык аліментаў - у іншай. Таму ўстаноўлена, што запазычанасць па аліментах вызначаецца, зыходзячы з сярэдняй заработнай платы работнікаў па краіне, што дасць магчымасць максімальна абараніць інтарэсы дзяцей, бацькі якіх знаходзяцца ў разводзе.
З аднаго боку, гэта цалкам разумныя рашэнні і змяненні, але, з іншага боку, нашы службы і органы апекі, на жаль, пакуль што не здольныя выконваць пастаўленыя перад імі задачы. Неабходна глабальнае рэфармаванне сістэмы, пачынаючы з сістэмаўтваральных элементаў. Часта органы апекі альбо залішне актыўна ўмешваюцца ў асабістае жыццё сям'і, альбо ніяк не ўзаемадзейнічаюць з неабходнымі членамі грамадства.
Гэта значыць, вышэйпералічаныя змены і ідэі добрыя і новыя, але метады і спосабы іх рэалізацыі ранейшыя.