БелПАН  прысвяціў  асобны матэрыял таму як бачаць лідары БПЗ стартэгію Зялёных на выбарах

Агенцтва піша: Беларуская партыя "Зялёныя" (БПЗ) будзе браць удзел у парламенцкіх выбарах да канца. Пра гэта на прэс-канферэнцыі 25 чэрвеня заявілі кіраўнікі партыі.

Намеснік старшыні БПЗ Дмітрый  Кучук паведаміў, што рашэнне пра ўдзел у выбарах было прынята цэнтральнай радай партыі на паседжанні 23 чэрвеня. "Мы абмеркавалі некалькі стратэгій: паўнавартасны ўдзел у выбарах, удзел у выбарах з здыманнем кандыдатаў перад галасаваннем, удзел толькі ў адной акрузе — акрузе № 59, у раёне будаўніцтва АЭС у Астраўцы, і байкот выбараў. Скажу сумленна, што калі б у краіне мелася рэальная магчымасць арганізаваць байкот выбараў, гэты варыянт бы перамог. Але сябры цэнтральнай рады большасцю ўсяго ў адзін голас прынялі рашэнне пра паўнавартасны ўдзел у выбарах", — распавёў Кучук.

Ён адзначыў, што БПЗ на прэзідэнцкіх выбарах зняла свайго кандыдата, але "на той момант БПЗ не атрымала ад гэтага якога-небудзь выніку". "Яшчэ і таму мы вырашылі ўдзельнічаць у парламенцкіх выбарах да канца", — дадаў Кучук.

Старшыня БПЗ Алег Новікаў паведаміў, што спіс кандыдатаў у дэпутаты ад БПЗ будзе сфармаваны напачатку жніўня. "Цяпер у нас ёсць сем чалавек, якія пагадзіліся прыняць удзел у выбарах. Увесну такіх людзей было 10—15 чалавек. Так што ва ўсіх ёсць час падумаць", — сказаў Новікаў.

"Мы не гонімся за нейкімі рэкордамі і не будзем выстаўляць на выбары кандыдатаў "для галачкі". Усе гэтыя людзі будуць з'яўляцца сябрамі  партыі. Для нас важна не колькасць кандыдатаў, а якасць праведзенай імі працы", — адзначыў Новікаў.

На пытанне, ці плануе партыя ўдзельнічаць у якіх або кааліцыях, актывіст БПЗ, кандыдат медыцынскіх навук Аляксандр Сікала адказаў: "Нажаль, аб'ядноўвацца не з кім — у тым сэнсе, што пэўнай праграмы, радыкальна адрознай ад таго, што засмоктвае нас цяпер у бездань глабальнай цывілізацыйнай катастрофы, мы не ўбачылі. А тое, што мы прапануем, не ўсё разумеюць і прымаюць. Таму мы змушаны ісці з самастойнай праграмай, высоўваць самастойныя мэты і задачы і разлічваць, першым чынам, на сябе, каб данесці да беларусаў тое разуменне зялёнага свету, якое сёння з'яўляецца індыкатарам сталасці — палітычнай, эканамічнай і сацыяльнай".

Прэс-служба Беларускай Партыі Зялёныя