Зялёныя накіравалі ліст са зваротам у  Камітэт па справах рэлігій пры Савеце Міністваў з прапановай увесці такія святы як дні адзінства з Украінай, Польшчай, Літвой, Латвіяй.

Тэкст зварота:

«Беларуская партыя "Зялёныя" выказвае занепакоенасць аднавектарным развіццём міжкультурных ўзаемаадносін Беларусі з краінамі-суседзямі. Мы вітаем ініцыятыву святкавання Дня адзінства народаў Расіі і Беларусі, які вось ужо 7 гадоў запар адзначаецца на тэрыторыі дзвюх краін.

Аднак мы занепакоеныя адсутнасцю адпаведных святочных урачыстасцяў з нагоды яднання народаў Беларусі і Украіны, Беларусі і Польшчы, Беларусі і Літвы, Беларусі і Латвіі.Сучасны стан міжкультурных ўзаемаадносін беларусаў і брацкіх народаў з пяцю краінамі-суседзямі не можа не насцярожваць. Бо на сёння большасць міжнародных мерапрыемстваў, якія тычацца міжкультурнай камунікацыі афіцыйнага Мінска з краінамі-суседзямі, маюць пэўную накіраванасць, якія кранаюць, у большасці сваім, толькі народы Расійскай Федэрацыі.

Мы прапануем лагічнае выйсце з сітуацыі, якая склалася, а менавіта: афіцыйнае абвяшчэнне асобных святочных дзён адзінства народаў Беларусі і Украіны, Беларусі і Польшчы, Беларусі і Літвы, Беларусі і Латвіі. Зыходзячы з нашай багатай гісторыі, у якой нямала сведчанняў аб духоўным, культурным і нават палітычным адзінстве насельніцтва нашай краіны з народамі краін-суседзяў, мы, для прыкладу, прыводзім некалькі дат, якія прэтэндуюць на ўключэнне ў спіс нацыянальных святаў Рэспублікі Беларусь.

Безумоўна, гэта 28 чэрвеня 1569 - дзень падпісання Люблінскай уніі паміж Вялікім княствам Літоўскім і Польшчай, што паклала пачатак такой дзяржаве як Рэч Паспалітая, якая з'яўляецца яркім прыкладам гістарычнага яднання беларусаў і палякаў. А таксама дата каранацыі Міндоўга ў Наваградку (29 чэрвеня 1253), гадавіну якой літоўцы адзначаюць штогод 6 ліпеня, ушаноўвая, тым самым, дату заснавання ВКЛ, якое з'яўляецца прамым доказам гістарычнага яднання беларусаў і літоўцаў. Яркіх гістарычных прыкладаў плённага супрацоўніцтва і ўзаемадзеяння паміж нашымі краінамі не злічыць, засталося толькі надаць ім належнае значэнне ў XXI стагоддзі.

Мы выказваем надзею, што нашы прапановы будуць пачутыя, і ўсталяванне новых афіцыйных святочных дат не прымусіць сябе доўга чакаць. Таксама мы выказваем надзею на тое, што працэс прызначэння новых дзяржаўных святаў будзе праходзіць у адпаведнасці з міжнароднымі нормамі пры актыўным удзеле шырокіх колаў насельніцтва Рэспублікі Беларусь, прадстаўнікоў НДА, дыпламатычных місій з Украіны, Польшчы, Літвы і Латвіі. Мы ўпэўненыя, што гэты крок аптымізуе шматвектарнае супрацоўніцтва ў галіне міжкультурных сувязяў і надасць новы імпульс міжкультурнаму дыялогу краін-суседзяў».

Прэс-служба Беларускай Партыі “Зялёныя”