4-5  мая ў Рыме адбылася сустрэча актывістаў руху FARE (Футбол супраць расізму ў Еўропе), у якой прыняў удзел прадстаўнік БПЗ.

Створаная ў 1997-ым годзе FARE - самая буйная ў Еўропе асацыяцыя грамадскіх арганізацый, якія змагаюцца супраць ксенафобіі і расізму на еўрапейскіх футбольных стадыёнах. У сваёй дзейнасці  FARE  непасрэдна супрацоўнічае з структурамі Еўрасаюзу, кіраўніцтвам UEFA і шматлікіх нацыянальных футбольных федэрацый . Так на сустрэчы ў Рыме прысутнічаў Джынкарло Аберте (Giancarlo Abete), старшыня італьянскай федэрацыі футболу і сябра выканкаму UEFA Карен Есплунд (Karen Espelund).

Праграма сустрэчы ў Рыме ўключала  перавыбары кіраўнцтва арганізацыі,  дэбаты па тэмах “Праца з меншасцямі”, “Дыскрымінацыя і спорт ў Еўропе” і інш.

Асобнае месца на канферэнцыі займала дыскусія,  прысвечаная  правядзенню ўлетку  турніру Еўра 2012 ва Украіне і ў Польшчы. Раней сябры FARE  правялі шмат працы па мабілізацыі грамадства ў гэтых краінах супраць магчымых праяў ксенафобскіх забабонаў падчас будучага чэмпіянату.  

Алег Новікаў, сябра БПЗ, які прыняў удзел у канферэнцыі кажа: “ Праца  FARE у рамках падрыхтоўкі  да Еўра 2012 мае выключнае значэнне таксама для Беларусі. Нажаль айчынны рух фанатаў з’яўляецца фермай  для правых радыкальных настрояў.  Гэта выклікана шмат у чым дзіўнай, у нечым нават правінцыйнай устаноўкай пра тое, што расізм -  фішка сапраўдных тыффозі. Падчас правядзення турніра Еўра 2012, на які прыедуць балельшчыкі  з Англіі, Францыі, Германіі і іншых перадавых футбольных дзяржаў,  беларускія аматары футболу  змогуць пераканацца ў тым, што расісты гэта маргінальная фракцыя на футбольных трыбунах Еўропы”.   

Крыніца: Прэс-служба Беларускай Партыі “Зялёныя”