Заява прэс - службы Беларускай Партыі "Зялёныя" ў сувязі з забаронай “па просьбе” вернікаў рок-оперы "Ісус Хрыстос - супер-зорка”.

Шматлікія аматары тэатральнага мастацтва і проста грамадзяне нашай рэспублікі чакалі  гастроляў Санкт-Пецярбургскага тэатра "Рок-Опера". Пра вялікую цікавасць беларускіх гледачоў да анансаванай рок-оперы "Ісус Хрыстос - супер-зорка", якая ўвайшла ў аналы сусветнай класікі, сведчаць і паспяховыя касавыя зборы.

І раптам выступы Санкт-Пецярбургскага тэатра ўсюды, акрамя Брэста, былі адменены з невыразнымі афіцыйнымі тлумачэннямі з”-за змены маршруту тэатра".

Як высвятлілася, Санкт-Пецярбургскаму тэатру "Рок-Опера" было проста адмоўлена ў выступах у шэрагу абласных цэнтраў Беларусі, пра што яго кіраўніцтва і заявіла на сваім афіцыйным сайце.

Прычынай зрыву гастроляў паслужылі нейкія "лісты вернікаў", якія сталі паступаць у органы мясцовай выканаўчай улады. На іх аснове і было прынята рашэнне "рэкамендаваць" адмяніць выступы расійскіх артыстаў. У выніку былі сарваныя планы тэатральнага калектыва,  пастраджалі гледачы і нават бюджэты гарадской культуры, якія былі вымушаныя павярнуць грошы зa набытыя квіткі.

Але самае галоўнае - па сутнасці парушаны канстытуцыйны прынцып Рэспублікі Беларусь пра свецкі характар нашай дзяржавы. У імя чаго гэта было зроблена?

Сучасная беларуская дзяржава не можа лічыцца занадта дэмакратычнай. Але ў разумнасці ўраду адмовіць цяжка. Прынамсі ў той вобласці, што тычыцца  ўласных практычных інтарэсаў кіраўніцтва. Што ж выйграла нават яно ад бессэнсоўнай забароны рок-оперы, паддаўшыся ціску рэлігійных фундаменталістаў? Сапсавала адносіны з адным з лепшых тэатральных калектываў Расіі? Выклікала незадаволенасць людзей, якія проста набылі квіткі ў тэатр? Атрымала раскол у грамадстве па рэлігійным прынцыпе? Што атрымалі шэраг іерархаў праваслаўнай царквы ў Беларусі, якія падтрымалі і фармальна сталі  ініцыятарамі гэтай фактычнай забароны? Тое, што праваслаўе стала сінонімам  цэнзуры? У чых гэта інтарэсах?

Нажаль, рознага роду цемрашальскія забабоны  даўно ўжо спрабуюць уварвацца ў наша жыццё, з'яўляючыся непазбежным следствам сацыяльнай рэакцыі апошніх дзесяцігоддзяў.

БПЗ выступае за захаванне свецкага характару беларускай дзяржавы, за захаванне праў вернікаў, так і свецкага грамадства і культуры, супраць бессэнсоўных забарон і распальвання ў нашай краіне анфліктаў на рэлігійнай глебе.

Свабоду мастацтву! Мір і згода - Беларусі!

Прэс-служба Беларускай Партыі "Зялёныя"