Міністэрства па надзвычайных сітуацыях (МНС) адказала на ліст Камісіі па праблемах забруджаных тэрыторый пры Беларускай Партыі "Зялёныя"

У сваім лісце дасланым на адрас МНС сп. Пётр Філон, старшыня Камісіі, прасіў міністэрства адказаць на шэраг пытанняў наконт працы будучай БелАЭС.   

“Якія і на якую тэрыторыю выкіды АЭС будуць распаўсюджвацца падчас нармальнай працы станцыі і ў выпадку аварыйнай сітуацыі?  Паколькі рэактар ВВЭР - 1200 нідзе раней не эксплуатаваўся, на падставе якіх дадзеных праводзіўся разлік магчымых выкідаў радыёнуклідаў?

Таксама прашу даць інфармацыю па пытаннях, якія  не асвятляліся ў СМІ:

1)         Перапрацоўка радыёактыўных адыходаў: дзе і кім яна будзе ажыццяўляцца, ці магчымы зварот кампанентаў перапрацаванага ядзернага паліва назад у Беларусь у выпадку вывазу яго ў Расію;

2)         Якая частка адыходаў плануецца да вывазу на перапрацоўку, а якая да захоўвання на тэрыторыі Беларусі;

3)         Транспартаванне радыёактыўных адыходаў да месца перапрацоўкі;

4)         Захоўванне адпрацаваных радыёактыўных адыходаў да адпраўкі на перапрацоўку;

5)         Якую шкоду могуць выклікаць няштатныя сітуацыі са сховішчамі радыёактыўных адыходаў;

6)         Якія прадугледжаны меры па мінімізацыі магчымасці ўзнікнення такіх сітуацый?”.

Адказ чыноўнікаў МНС на ліст вельмі арыгінальны. У прыватнасці ў ім гаворыцца “Ваш зварот быў перададзены Рабочай групе для каардынацыі рэалізацыі дзяржанага кантроля за будаўніцтвам беларускай атамнай станцыі. (…) Задачай групы з’яўляецца каардынацыя  рэалізацыі дзяржанага кантроля за будаўніцтвам беларускай АЭС. У гэтай сувязі разгляд пытанняў, якія былі Вамі зададзеныя, не адносіцца да кампетэнцыі групы”.

Бліжэйшым часам Камісія па праблемах забруджаных тэрыторый пры Беларускай Партыі "Зялёныя" зробіць каментар на ліст з МНС.

Крыніца Прэс-служба Беларускай Партыі “Зялёныя”