Беларуская партыя “Зялёныя”, Партыя БНФ і Рух “За Свабоду” распачынаюць кампанію “Народны кантроль – за сумленныя выбары!”, прымеркаваную да гэтак званых “выбараў-2012” у Палату прадстаўнікоў. Пра яе старт і асаблівасьці будзе расказана 20 лютага падчас адмысловай прэсавай канферэнцыі.

Асноўная задача кампаніі – прыцягненьне грамадзян да ўдзелу ў выбарчых камісіях і ў якасьці назіральнікаў.

Усе суб’екты кампаніі “Народны кантроль – за сумленныя выбары!” зьяўляюцца зарэгістраванымі агульнанацыянальнымі арганізацыямі, якія могуць самастойна вылучаць прэтэндэнтаў на ўдзел у камісіях і назіральнікаў па ўсёй Беларусі на ўсіх акругах. Пры належнай актыўнасьці грамадзян ёсьць магчымасьць “закрыць” сяброўствам у выбарчых камісіях і назіраньнем усе 110 акругаў на “выбарах-2012”.

Сваімі сіламі Беларуская партыя “Зялёныя”, Партыя БНФ і Рух “За Свабоду” разьлічваюць патрапіць у выбарчыя камісіі, у тым ліку і ў Цэнтральную камісію па выбарах і рэферэндумах,  і ў назіральнікі на 25-30% акругаў.

Прэс-канферэнцыя прадстаўнікоў Беларускай партыі “Зялёныя”, Партыі БНФ і Руху “За “Свабоду” адбудзецца ў панядзелак, 20 лютага, аб 11-й гадзіне ў офісе Партыі БНФ па адрасе: вул. Чарнышэўскага 3.

Прэс-служба Беларускай Партыі “Зялёныя”