17-га студзеня агенства БЕЛТА распаўсюдзіла сенсацыйную інфармацыю пад назвай “Беларусь пераходзіць да зялёнай эканомікі”

Пра гэта размаўлялі на круглым стале, які арганізавала Мінітэстэства  прыродных рэсурсаў і аховы навакольнага асяроддзя.

Намеснік міністра Галіна Волчуга, як піша БЕЛТА, адзначыла, што "ідучы па шляху ўстойлівага развіцця, Беларусь за кошт асобных элементаў ужо фармуе "зялёную эканоміку"…У адпаведнасці з распараджэннем прэм'ер-міністра сфармавана працоўная група, якая павінна вызначыць пазіцыю Беларусі на міжнародных перамовах па прынцыпах "зялёнай эканомікі", а таксама выпрацаваць стратэгію тэхналагічнага развіцця эканомікі, заснаваную на "зялёных прынцыпах". "Мы ўжо падышлі да фармавання праекта пазіцый Беларусі па дадзеным пытанні", - распавяла Галіна Волчуга.

Можна было б толькі радавацца навінам з Мінпрыроды, калі б не сумны вопыт. Існуе рызыка, што “зялёная эканоміка” па-беларуску стане чарговай прафанацыяй вядомых эканамічных тэорый у імя інтарэсаў прапаганды. У свой час, кал верыць афіцыйным СМІ, мы будавалі сацыяльна –арыентаваную гаспадарку (краевугольны камень тэорыі эсдэкаў), пасля эканоміку ў рамках т.з. канцэпцыі  Дзяржава для народу ( тэрмін з праграмы кансерватараў). У мінулым годзе пасля падпісання дырэктывы «Пра развіццё прадпрымальніцкай ініцыятывы», афіцыёз кляўся, што  мы сталі на шлях азіяйкіх тыграў накшталт ультра-ліберальнага Сінгапура. Відавочна, што ніводная з тых эканамічных тэорый цалкам у Беларусі рэалізваная не была. Няўжо цяпер прыйшоў час выкарыстаць прывабны лейбл “зялёная эканоміка”?

Хочацца верыць, што гэта не так і урад сапраўды вырашыў заняцца будаўніцтвам “зялёнай эканомікі”. У такім разе нас чакаюць цікавыя часы. Зялёная мадэль гаспадаркі, відавочна, немагчыма без высокай экалагічнай адказнасці асобнага грамадзяніна. Гэты імператыў фармуецца не цыркулярамі, а стымуляваннем з боку дзяржавы актыўнай грамадзянскай пазіцыі, удзелу людзей ў палітычных працэсах і дыскусіях па галоўных праблемах грамадства, у тым ліку па той жа праблеме будаўніцтва АЭС. Толькі тады можна будзе ўсур’ёз казаць пра перспектывы “зялёнай эканомікі”.

Прэс служба Беларускай Партыі Зялёных