9-12 -га ліпеня ў ЕС прайшла акцыя “Зялёны аўтобус” з удзелам прадстаўніка БПЗ, у рамках якой ён выступіў ў нямецкім парламенце.
Тэкст выступу Яўгена Герасіменка, актывіста БПЗ, у Бундэстагу.
Яўген Герасіменка: На сённяшні дзень Беларусь з'яўляецца адной з нешматлікіх Еўрапейскіх краін, якая можа ганарыцца тым, што не мае на сваёй тэрыторый аніводнай атамнай станцыі. Больш за тое, бяз'ядзерны статус краіны закладзены ў канстытуцыю рэспублікі ад 1996 года.
Беларусь мае горкі вопыт ліквідацыі наступстваў катастрофы на Чарнобыльскай АЭС, у выніку якой 24 адсоткі тэрыторыі краіны былі забруджаныя. Жыхары соцен вёсак і пасёлкаў былі вымушаныя пакінуць свае дамы.
Сёння ў найбольш забруджаных раёнах, у такіх як: Веткаўскі, Хойніцкі, Лоеўскі, Брагінскі і Добрушскі пражывае каля 200 тысяч чалавек. Таксама гэтыя тэрыторыі выкарыстоўваюцца для вытворчасці сельскагаспадарчай прадукцыі, што падвяргае рызыке здароўе людзей не толькі з гэтых раёнаў.
Некалькі гадоў таму з падачы кіраўніцтва краіны быў ініцыяваны праект Астравецкай атамнай электрастанцыі на поўначы Беларусі ў пяцідзесяці кіламетрах ад Літоўскай сталіцы. Запланаваная магутнасць двух энергаблокаў складае 2/4 гігавата (ГВт), праект рэактара расейскай кампаніі Росатам ВВЭР-1200 яшчэ нідзе не быў рэалізаваны.
Па праведзеных раней даследваннях міністэрства энергетыкі Беларусі, мадэрнізацыя наяўных у краіне цеплаэлектрастанцый дазволіць павялічыць іх сумарную магутнасць на адну траціну. У 2011 годзе праводзілася даследаванне тэрыторыі краіны на прадмет магчымага ўзвядзенне парка ветрагенератараў ў пяці раёнах Мінскай і Гродзенскай абласцей, з меркаванай магутнасцю 1.6 ГВт. Пры мадэрнізацыі наяўнай энергасістэмы і развіцці крыніц альтэрнатыўнай энергіі, ад будаўніцтва Астравецкай АЭС цалкам можна адмовіцца. Тым не менш, паглыбленне эканамічнага крызісу і знешні доўг краіны, у памеры 30 мільярдаў, не служыць матывацыяй для адмовы ад Расійскага крэдыту ў памеры 10 мільярдаў пад будаўніцтва АЭС.
Тыдзень таму тэрыторыя нашай краіны была падвергнутая “бамбардзіроўцы” плюшавымі мядзведзікамі, рукамі дзьвум энтузіястам са Швецыі, якія з лёгкасцю пераадолелі мяжу нашай дзяржавы на самалёце і засталіся незаўважанымі для ВПС (Ваенна Паветраных Сілаў). Гэты прэцэдэнт з'яўляецца прамым доказам няздольнасці нашай супрацьпаветранай абароны і бязсэнсоўным марнаваннем сродкаў на падтрыманне комплексаў СПА(Супраць Паветранай Абароны), якая прызначана абараніць АЭС ад магчымых тэрарыстычных нападаў.
У верасні бягучага года ў Беларусі пройдуць парламенцкія выбары. Досвед папярэдніх выбараў кажа пра тое, што яны пройдуць з парушэннямі. Аднак мы, БПЗ, сканцэнтравалі свае намаганні на 59-й выбарчай акрузе, у якую ўваходзіць горад Астравец дзеля таго каб супрацьстаяць надыходзячай экалагічнай і эканамічнай катастрофе нашай краіны. У межы парламенцкай кампаніі ўваходзіць кампанія па назіранню на ўсіх выбарчых участках абранай выбарчай акругі, аднак і гэта не можа гарантаваць адсутнасці укідаў бюлетэняў за праўладнага кандыдата.
Мы выказваем надзею на пазітыўны вынік гэтай кампаніі, а менавіта адмову кіраўніцтва краіны ад планаў па будаўніцтву Астравецкай АЭС. Але неабходна адзначыць, што магчымасць справядлівага падліку галасоў вельмі нізкая, таму толькі пры ўдзеле нашых еўрапейскіх саюзнікаў у якасці назіральнікаў, шанцы на перамогу кандыдата ад Беларускай партыі "Зялёныя" становяцца больш рэальнымі.
Прэс-служба Беларускай Партыі Зялёных